Aqtóbede erekshe kútim qajettiligi bar balalardy uryp-soqqan sanıtar sottaldy

2022 jylǵy 3 qazan, 21:31
Aqtóbede erekshe kútim qajettiligi bar balalardy uryp-soqqan sanıtar sottaldy

AQTÓBE. QazAqparat – Aqtóbede «Úmit» balalar úıinde tárbıelenetin erekshe kútim qajettilikteri bar balalardy uryp-soqqan sanıtarǵa sot úkimi shyqty. Oǵan 4 jyl 6 aıǵa bas bostandyǵyn shekteý jazasy taǵaıyndaldy, dep habarlaıdy QazAqparat tilshisi.

№2 Aqtóbe qalalyq soty «Úmit» balalar úıindegi oqıǵaǵa qatysty úkim shyǵardy. Aıyptalýshy K. 2022 jyldyń sáýir aıynda sanıtar bolyp jumys isteı júrip, sonda tárbıelenetin erekshe kútim qajettiligi bar balalardy uryp-soqqan. Sot otyrysy kezinde áleýmettik ortalyq qyzmetkeri kinásin tolyq moıyndap, shyn júrekten ókinetinin bildirdi. Jábirlenýshiler sottalýshyǵa keshirim berdi.

«Sottalýshy óz kinásin moıyndady. Jábirlenýshilerdiń aıǵaqtary jáne basqa da dáleldemeleri rastalady. Jalpy, Qylmystyq kodekstiń «Qınaý» baby boıynsha 4 jyldan 7 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý jazasy qaralǵan. Sot qylmystyq jaýaptylyqty jeńildetetin mán-jaılar retinde sottalýshynyń shyn júrekten ókinetinin, asyraýynda jas balalarynyń bar ekenin eskerdi. Qylmystyq jaýaptylyqty aýyrlatatyn mán-jaılar anyqtalǵan joq. Sot sanıtardy kináli dep tanyp, oǵan 4 jyl 6 aı merzimge bas bostandyǵyn shekteý túrindegi jaza taǵaıyndady», - dep habarlady Aqtóbe qalasy №2 sotynyń baspasóz qyzmeti.

Sot úkimi zańdy kúshine engen joq.

Eske salsaq, Aqtóbede arnaıy mektep-ınternat balalaryn uryp-soqqan meıirbıke tórt jylǵa bostandyǵyn shekteý jazasyna kesilgen bolatyn.


Tegı:
Sot   Bala   Aqtóbe  
Seriktester jańalyqtary

Jańalyqtar