Aqtóbede búkil polıtsııa bóliminde front keńse jumys istep tur
2022 jylǵy 28 qańtar 02:56

Aqtóbede búkil polıtsııa bóliminde front keńse jumys istep tur

AQTÓBE. QazAqparat – Aqtóbe oblysynda jasóspirimder arasyndaǵy qylmys sany shamamen 20% tómendedi. Qazirgi kezde quqyq qorǵaýshylarmen kezdesip, olarǵa aryz-shaǵym berý úshin barlyq polıtsııa bóliminde front keńse jumys istep tur, dep habarlaıdy QazAqparat tilshisi.

«Aqtóbe» telearnasynyń «Oı túrtki» baǵdarlamasynda «Polıtsııaǵa qurmet – elge mindet» taqyryby talqylandy.

Onda Aqtóbe oblystyq polıtsııa departamenti bastyǵynyń mindetin Qanat Álıev qańtardaǵy jappaı tártipsizdik kezinde 25 polıtsııa qyzmetkeri, onyń ishinde úsh áskerı túrli dene jaraqatyn alǵanyn aıtty.

Qazirgi kezde aýyr jáne asa aýyr qylmys jasady degen kúdikpen 14 is qozǵaldy.

Vedomstvoaralyq tergeý toby da qurylyp, arnaıy prokýror basqardy.

«Qazirgi kezde 19 adam kúdikti retinde tanyldy. Onyń ekeýi úıqamaqta bolsa, ózgesi tergeý sotynyń sheshimimen ýaqytsha tergeý ızolıatorynda otyr. Biz qyzmetke kelgende halyq úshin, el úshin qyzmet atqaramyz dep ant berdik. Tynyshtyqty, qoǵamdyq qaýipsizdikti saqtaý mindetimiz, paryzymyz. Al ustalǵan kúdiktilerge qatysty aıtar bolsam, Qylmystyq-protsesýaldyq kodekske sáıkes bárine advokat taǵaıyndaldy. Qorǵaýshylardyń, protsestik prokýrorlardyń qatysýymen tergeý kezinde foto, beınetaspaǵa túsirildi. Kúdiktilerge sol kúni sot-medıtsınalyq saraptama taǵaıyndalady»,-dedi oblystyq PD tergeý basqarmasynyń bastyǵy Áset Qalıev.

Tergeýdiń ashyqtyǵyn qamtamasyz etý úshin ár tergeý bólmesine beınebaqylaý kamerasy qoıyldy.

Jáne barlyq materıal ortalyqqa birden jiberiledi.

«Keıbir adamdar ýchaskelik polıtsııany tanymaımyz, kórmeımiz deıdi. Eger adam eshqandaı quqyq buzbasa, túzý jolmen júrse polıtsııaǵa muqtajdyq joq. Al eger kómek qajet bolsa, onda kez kelgen ýaqytta tabylamyz. Byltyrdan bastap ýchaskelik polıtsııa ınspektorlary beınehabarlama taratty. Olardyń fotolary men baılanys nómirleri ilindi. Áleýmettik jelilerde paraqsha ashyldy. Ár bólimshede frond-keńse jumys istep tur»,- dedi Aqtóbe oblystyq polıtsııa departamenti bastyǵynyń mindetin atqarýshy Qanat Álıev.

Baǵdarlamada oblystyq máslıhat depýtattary men qoǵamdyq uıym ókilderi de óz oıyn bildirdi.

«Qıyn kezde polıtsııadan kómek suraıtynymyz jasyryn emes. Olar da dárigerler sııaqty pandemııada alǵy shepte boldy. Quqyq qorǵaýshylar qaıyrymdylyq isterimen de erekshelenedi. Únemi muqtajdarǵa kómektesedi. «Dobro«, «Jas saqshy«, «Zello poisk« tobymen etene tyǵyz jumys istep, úlken nátıjege qol jetkizip keledi. Jáne bul baılanys ári qaraı jalǵasady dep oılaımyn»,- dedi erikti Nurbek Jalǵaspaev.

Aıta keteıik, Aqtóbe oblysynyń aýmaǵynda ıývenaldyq polıtsııa ınspektorlary kún saıyn jergilikti reıd ótkizedi.

2021 jyl ishindegi reıd nátıjesinde ІІO-ǵa kámeletke tolmaǵan 5714 bala jetkizildi.

Onyń ishinde túngi ýaqytta kóńil kóterý oryndarynda, ata-anasynyń nemese zańdy ókilderiniń erip júrýinsiz bolǵan 88 kámeletke tolmaǵandar bar.

Kámeletke tolmaǵan balalardy tárbıeleý jónindegi mindetterdi oryndamaǵany úshin 216 ata-ana ákimshilik jaýapqa tartyldy.

662 jasóspirim jáne 481 qolaısyz otbasy ІІO esebine qoıyldy.

Byltyrǵy 12 aıdyń qorytyndysy boıynsha oblys aýmaǵynda kámeletke tolmaǵandar jasaǵan qylmystardyń 19,8% tómendegeni baıqaldy.


Jańalyqtar

MURAǴAT