Aqtóbede bomba qoıyldy degen habardan soń 4 JOO ǵımaraty tekserildi
2022 jylǵy 31 mamyr 16:29

Aqtóbede bomba qoıyldy degen habardan soń 4 JOO ǵımaraty tekserildi

AQTÓBE. QazAqparat – Aqtóbe oblystyq Polıtsııa departamentine joǵary oqý oryndarynyń ǵımaratynda bomba bar degen habarlama tústi. Arnaıy qyzmetkerler birneshe saǵat boıy izdeý jumysyn júrgizdi, dep habarlaıdy QazAqparat tilshisi.

Búgin saǵat 12:30 shamasynda túsken habarlamadan soń barlyq shuǵyl qyzmet pen saperler toby dereý oqıǵa ornyna bardy. Ǵımarattardan jarylǵysh qurylǵylardy izdedi.

«M.Ospanov atyndaǵy Batys Qazaqstan medıtsına ýnıversıteti, Q.Jubanov atyndaǵy AÓM ýnıversıteti, Ekonomıka jáne statıstıka ınstıtýty jáne M.Bókenbaev atyndaǵy Aqtóbe zań ınstıtýtynyń ǵımaratynan stýdentter, oqytýshylar jáne jumysshylar shyǵaryldy. Jarylǵysh qurylǵylar tabylǵan joq. Polıtsııa departamenti anonımdi habarlamalardyń avtoryn anyqtaýǵa jáne ustaýǵa baǵyttalǵan jedel is-sharalar júrgizip jatyr», - dedi oblystyq PD baspasóz qyzmetiniń jetekshisi Erbolat Sarqulov.


Aıta keteıik, Qylmystyq kodekstiń «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Osy baptyń sanktsııasy bes jylǵa deıingi merzimge bas bostandyǵynan aıyrý túrindegi jazany kózdeıdi.

Eske salsaq, byltyr Aqtóbe qalasyndaǵy birneshe mekteptiń elektrondy poshtasyna «bilim ordasynda bomba bar» degen habarlama túsip , tekserý júrdi. Alaıda habarlamany kimniń jibergeni áli kúnge deıin belgisiz.



Seriktester jańalyqtary

Jańalyqtar

Úrdis

MURAǴAT