Jańalyqtar  >
Aqtóbede «Baqytty Bala» balalar festıvali ótip jatyr
2022 jylǵy 13 tamyz 00:43

Aqtóbede «Baqytty Bala» balalar festıvali ótip jatyr

AQTÓBE. QazAqparat - Aqtóbede «Baqytty Bala» balalar festıvali ótip jatyr. Oǵan álemniń birneshe elinen 21 ónerpaz irikteldi, dep habarlaıdy QazAqparat tilshisi.

«Baıqaýdyń óz ereksheligi bar. Ár elden kelgen balalar bir atanyń balasyndaı tatý. Bizdiń tilegimiz de osy. Olar básekeles emes, dos sııaqty. Jeńisine qýanady, shyn kóńilin bildiredi. Munda iriktelgen balalardyń bári jeńimpaz dep aıtýǵa bolady. «Baqytty bala» dep ataýdyń negizi de osynda jatyr», - dedi baıqaý uıymdastyrýshysy, qazylar alqasynyń múshesi Qanat Aıtbaev.

Ánshi Dımash Qudaıbergenniń ákesi Qanat Aıtbaev onyń josparymen de bólisti.

«Táýelsizdiktiń 25 jyldyǵyna oraı Qazaqstannyń barlyq qalasyn aralap shyǵyp, túıindi kontsert Aqtóbede ótti. Odan keıin josparyna qaraı 2017, 2018, 2019 jyldary ártúrli elderde, onyń ishinde astanada eki kontsertin berdi. Eýropada josparly kontsertteri ótti. Almatyda da bolady. Amandyq bolsa josparly túrde Aqtóbede de bolady. Ázirge geografııalyq sheńberin keńeıtip, qazaqtyń ónerin pash etip júr», - dedi ol.

Sonymen birge óńirge Dımash Qudaıbergenniń fanattary da keldi.

«Biz Ýfa qalasynan kelip turmyz. 2018 jyly bizde fanklýb ashylyp, basymyz qosyldy. Aqtóbege ekeýimiz keldik. Al Almatydaǵy kontsertke on adam qatyspaqpyz», - dedi Elvıra ıÝnýsova.

Aıta keteıik, «Baqytty Bala» baıqaýy alǵash ret 2018 jyly bastaldy. Ótken jyldardyń jeńimpazdary men qatysýshylary Dımash Qudaıbergenniń jeke kontsertteri aıasynda, onyń ishinde London men Nıý-Iorkte bir sahnada óner kórsetýge biregeı múmkindik aldy. Bıyl baıqaýǵa Reseı, Ózbekstan, Túrkııa, Ýkraına, Polsha, Ispanııa, Rýmynııa, Ázirbaıjan, Armenııa, Bolgarııa, Afrıka elderi men Qazaqstannyń barlyq qalalarynan 200-den astam jas vokalıst ótinish bildirgen. Іrikteý kezeńiniń qorytyndysy boıynsha fınalǵa 21 ónerpaz shyqty. Bul kúnderi olar «Óner ortalyǵynyń» kontsert zalynda baıqaýdyń Gran-prı júldesin sarapqa salyp jatyr. Qatysýshylar eki shyǵarmany – ana tilindegi ándi jáne álemdik hıt nemese avtorlyq ándi oryndaýy kerek.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT