Aqtóbede ákimdikten basqa ǵımarat búlingen joq – oblys ákiminiń birinshi orynbasary
2022 jylǵy 12 qańtar 13:24

Aqtóbede ákimdikten basqa ǵımarat búlingen joq – oblys ákiminiń birinshi orynbasary

AQTÓBE. QazAqparat – Aqtóbede tek oblys ákimdiginiń ǵımaraty búlindi. Qazirgi kezde shyǵyn kólemi shamamen 300 mıllıon teńge dep boljanyp otyr. Bul týraly oblys ákiminiń birinshi orynbasary Rýslan Hambarov Óńirlik kommýnıkatsııalar qyzmetinde ótken tikeleı efır kezinde aıtty, dep habarlaıdy QazAqparat tilshisi.

Aqtóbede beıbit sherý bastalǵan kezde oblys ákimdiginiń aldyna 2 myńǵa jýyq adam jınalǵan. Oblys ákiminiń birinshi orynbasary Rýslan Hambarovtyń aıtýynsha, olar birneshe máseleni kóterdi.

«Bastapqy talaptary - gaz baǵasyn tómendetý, azyq-túlik baǵasynyń ósýin tejeý jáne jalaqyny kóterý boldy. Ári qaraı Úkimet quramyn almastyrý sııaqty saıası sıpattaǵy talaptar qoıyldy. Osyǵan baılanysty, oblys ákimdigi tarapynan, narazy toppen baılanys ornatý jáne túsindirý jumystaryn júrgizý boıynsha áreketter jasaldy. Alaıda arnaıy arandatýshylarǵa jáne mıtıngtiń stıhııalyq kórinis alýyna baılanysty, syndarly dıalog qurý múmkin bolmady. Shynyn aıtý kerek, jınalǵan jurt ákim nemese ákimniń orynbasarlaryn tyńdaýǵa qulqy da, nıeti de bolǵan joq», - dedi Aqtóbe oblysy ákiminiń birinshi orynbasary Rýslan Hambarov.

Onyń aıtýynsha, oblys aýdandarynda narazylyq aktsııalary ótkizilgen. Narazylyq bildirýshiler «Aqtóbe-Astrahan», «Samara-Shymkent», «Qarabutaq-Qostanaı», «Qandyaǵash-Embi» tasjoldaryn jaýyp tastaǵan. Sonymen birge temirjol stantsııalarynda qozǵalys toqtatylǵan.

Aıta keteıik, jalpy oblys boıynsha qoǵamdyq tártipti qamtamasyz etý úshin 2000-ǵa jýyq polıtsııa jáne Ulttyq ulannyń áskerı qyzmetshileri tartyldy. Jappaı tártipsizdik kezinde 17 polıtsııa qyzmetkeri jaraqat alǵan. Qazir 2 qyzmetker aýrýhanada em alyp jatyr.

«Qazirgi ýaqytta, oblys boıynsha jaǵdaı birqalypty. Barlyq tirshilikke qajetti nysan, qoǵamdyq kólikter shtattyq rejımde jumys istep tur. Sondaı-aq, iri óndiris kásiporyndary jáne qarjy mekemeleri óz jumystaryn jandandyrdy. Derekterge sáıkes, Aqtóbe oblysy ákimdigi ǵımaratynan basqa strategııalyq nysandar (aeroport, energetıkalyq nysandar) jáne shaǵyn orta bıznester zardap shekken joq. Tek oblys ákimdiginde orgtehnıkalardy alyp ketken. Qazirgi kezde shyǵyn kólemin 300 mln teńge dep boljanyp otyr», - dedi Rýslan Hambarov.


Uqsas jańalyqtar

Jańalyqtar

MURAǴAT