Aqtóbede 1800 kezekshi synyp ashylady

AQTÓBE. QazAqparat – Aqtóbede 207 mekteptiń 15 myńnan astam oqýshysy 1 qyrkúıekten bastap mektepke baryp, bilim alady. Bıyl 1800 kezekshi synyp ashylady, dep habarlaıdy QazAqparat tilshisi.

Búgin Aqtóbe oblysynyń ákimi Ońdasyn Orazalın jańa oqý jylyna daıyndyq jaıyn aıtty. Oblys boıynsha 402 mektep bolsa, onyń 207-i dástúrli túrde bilim berýin jalǵastyrady. Ózgesi qashyqtan oqytýǵa daıyndyqty bastady.

«207 mektepte 15,5 myń bala bar. Bul barlyq oqýshynyń 9 paıyzyn ǵana qurap otyr. Oblys boıynsha 143 myńnan astam bala qashyqtan oqıdy. Ári kezekshi synyptar jumys isteıdi. Balalardyń dene qyzýy turaqty ólshenedi, synyp ishinde aýany tazartý, kvartstaý sharasy jıi júrgiziledi. Áleýmettik araqashyqtyqty saqtaý úshin birneshe aýysym bolady. Soǵan sáıkes keste jasalady», - dedi oblys ákimi Ońdasyn Orazalın. Kezekshi synyptarǵa balalar ata-ana ruqsatymen alynady. Aqtóbe oblysy boıynsha 1800 kezekshi synyp uıymdastyrylady. Pedagogtar jalaqysyna qosymsha ústemaqy alady. Qarjy jergilikti bıýdjetten bólinetin boldy.

«Oqýlyqpen qamtamasyz etý úshin oblystyq bıýdjetten 1,7 mıllıard teńge qaraldy. Qazir 18 baspahanamen kelisimshart bar. Jetkizý jumysy júrip jatyr. Kóbi Almaty qalasynan keledi. Búgingi kúni mektep kitaphanasyndaǵy oqýlyq taratylyp jatyr. Bul baǵyttaǵy jumys 25 tamyzda aıaqtalady», - dedi Ońdasyn Orazalın.

Aıta keteıik, oblys boıynsha 17,5 myń kompıýter az qamtylǵan otbasynyń balalaryna berildi. Al suranys 44,5 myńdy quraıdy. Balalar úshin respýblıkalyq bıýdjetten 3 mıllıard teńgege jýyq qarjy qarastyryldy. Oǵan 20 myń tehnıka satyp alynady. Al oblys qazynasynan bólingen qarjyǵa 10 myń kompıýter taratylady.