Aqtóbe shekarasynda Qazaqstandaǵy alǵashqy ınspektsııalyq tekserý kesheni ashyldy

AQTÓBE. QazAqparat – Búgin Aqtóbe – Orynbor shekara beketinde Qazaqstandaǵy alǵashqy ınspektsııalyq tekserý kesheni ashyldy, dep habarlaıdy QazAqparat tilshisi Aqtóbe oblysy ákiminiń baspasóz qyzmetine silteme jasap.

Jańa nysannyń ashylý saltanatyna aımaq basshysy Ońdasyn Orazalın, oblystyq prokýratýranyń, polıtsııa jáne memlekettik kirister departamentteri men №2030 áskerı bóliminiń basshylary qatysty.

«Memleket basshysy elimizdiń shekara qaýipsizdigine basa nazar aýdarady. Bul mańyzdy nysannyń ashylýy osynyń aıqyn aıǵaǵy. Óńirde shekara júıesiniń qyzmetin jetildirý, shekara baqylaýy kezinde zamanaýı tehnologııalardy paıdalaný, Qazaqstan aýmaǵyna zańsyz taýarlardyń, qarý men esirtki zattaryn ákelýdiń aldyn alý sharalary qabyldanyp jatyr», —dep atap ótti Ońdasyn Orazalın.

Keıin óńir ákimi № 2030 áskerı bóliminiń tórt áskerı qyzmetshisi men «Vera Constrution» JShS-niń eki ókiline memlekettik shekarany kúzetýde kórsetken joǵary nátıjeleri úshin alǵys hattar tabys etti.

Bul – shekarada ornalasqan Qazaqstandaǵy alǵashqy keshen. Onyń alańy 450 sharshy metr, bıiktigi 6 metr. Táýlik boıy jumys isteıdi. Keshen kóliktiń barlyq túrin jáne olardyń ishin tekserýge arnalǵan. Baqylaý aımaǵy qaýipsiz ári konteınerlerdegi taýardyń formasyn anyq kórýge múmkindik beredi. Kontrabandalyq zattardy birden anyqtaıdy. Joba quny - 1 mlrd teńge. Aldaǵy ýaqytta Aqtóbe oblysynyń barlyq shekara beketi osyndaı keshendermen jabdyqtalatyn bolady.