Aqtóbe oblysynyń úzdik muǵalimderine 1,5 mln teńgeden berildi

2022 jylǵy 1 qazan, 20:35
Aqtóbe oblysynyń úzdik muǵalimderine 1,5 mln teńgeden berildi

AQTÓBE. QazAqparat - Aqtóbede Ustazdar kúni qarsańynda úzdikter marapattaldy. «Aqtóbe oblysynyń úzdik muǵalimi» ataǵynyń ıegeri atanǵan 5 muǵalim 1,5 mıllıon teńge, úsh muǵalim «Aqtóbe oblysynyń qurmetti muǵalimi» júldesine jáne 900 myń teńgeden astam syıaqyǵa ıe boldy, dep habarlaıdy QazAqparat tilshisi.

Aqtóbe oblysynyń ákimi Eraly Toǵjanov Ustazdar kúni qarsańynda úzdik pedagogter jáne bilim salasynyń ardagerlerimen kezdesti.

Aımaq basshysy ustazdyń árbir adam men jalpy qoǵam ómirindegi alatyn orny erekshe ekenin atap ótti.

«Ár adamnyń artynda ustaz turady. Sondyqtan ustazdar táýelsizdik tuǵyrynda elimizdiń týyn jelbiretti desek artyq bolmas. Óskeleń urpaqqa halqymyzdyń baǵa jetpes jetistigi táýelsizdikti kózdiń qarashyǵyndaı saqtaý árbir qazaqstandyqtyń basty mindeti ekenin uǵyndyrý kerek. Ol úshin qaıratty, namysshyl, rýhy bıik jastardy tárbıeleıtin orta kerek. Al munda muǵalimniń róli óte joǵary. El bolashaǵyn sezinetin, onyń namysyn qorǵap, memleketimizdiń týyn bıikke jelbiretetin ul-qyzdarymyzdy tárbıelep otyrǵan – ustazdar», – degen Eraly Toǵjanov.

Jıyn barysynda ulttyq-patrıottyq tárbıe berý, pedagogterdyń biliktiligin arttyrý jáne bilim sapasynyń ózekti máseleleri talqylandy. S aladaǵy jetistikterdi de sóz etti.

Bıyl oblysta 26 balabaqsha men 6 mektep paıdalanýǵa berilmek. Barlyǵy 4,4 mlrd teńgege 14 mekteptiń qurylysy júrgizilip jatyr. Qosymsha bilim berýmen oqýshylardyń 78,5% qamtylǵan.

3 pen 6 jas aralyǵyndaǵy balalardyń 100% balabaqshaǵa barady. 814 mln teńgege 6 aýyldyq kolledjdiń materıaldyq-tehnıkalyq bazasy jańartyldy.

Kolledjderde bilim alýǵa memlekettik tapsyrys kólemi 5350 orynǵa deıin ulǵaıtyldy.

Sonymen qatar, ótken jylǵy respýblıkalyq olımpıadanyń qorytyndysy boıynsha Aqtóbe oblysynyń qurama komandasy eń úzdik olımpıadalyq komanda ataǵyn ıemdendi.

«Memleket basshysynyń Jańa Qazaqstandy qurý ıdeıasyn júzege asyrýda bilim berý júıesi erekshe oryn alady. Oblysta 300 myńǵa jýyq bala bar. Bul oblys halqynyń 30 paıyzy. Bul eldiń bolashaǵy. Jańa Qazaqstannyń qalyptasýyn balabaqsha qabyrǵasynan bastaý kerek. Muǵalimderge úlken jaýapkershilik júkteledi. Búgingi tańda ustazdarǵa qoıylyp otyrǵan mindet – jastardy qundylyqqa baǵdarlaı otyryp tárbıeleý», – dedi E.Toǵjanov.

Jıynda erekshe jetistikteri men bilim salasyn damytýǵa qosqan úlesi úshin ustazdar men ardagerler Qazaqstan Respýblıkasy oqý-aǵartý mınıstrliginiń marapattarymen, oblys ákiminiń jáne halyqaralyq uıymdardyń Alǵys hattarymen marapattaldy.

Oblystyq baıqaýdyń qorytyndysy boıynsha «Aqtóbe oblysynyń úzdik muǵalimi» ataǵynyń ıegeri atanǵan 5 muǵalim 1,5 mıllıon teńgeden aqshalaı syılyq ıelense, úsh muǵalim «Aqtóbe oblysynyń qurmetti muǵalimi» júldesine jáne 900 myń teńgeden astam syıaqyǵa ıe boldy.

Barlyǵy 100-den astam maman túrli nagrada aldy.


Tegı:
Uqsas jańalyqtar
Seriktester jańalyqtary

Jańalyqtar