Aqtóbe oblysynda jyl sońyna deıin 2 myń oryndyq 6 mektep paıdalanýǵa beriledi
2022 jylǵy 17 tamyz 23:35

Aqtóbe oblysynda jyl sońyna deıin 2 myń oryndyq 6 mektep paıdalanýǵa beriledi

AQTÓBE. QazAqparat – Bıyl Aqtóbede quny 68 mlrd teńgeniń 18 ınvestıtsııalyq jobasy iske asyrylady. Shaǵyn jáne orta bıznesti damytýǵa shamamen 12 mıllıard teńge bólingen, dep habarlaıdy QazAqparat tilshisi.

Óńir basshysy Ońdasyn Orazalın oblystyq máslıhattyń sessııa jumysynda birinshi jartyjyldyqty qorytyndylady.

Barlyq salada turaqty ósim bar. Ónerkásiptiń ósý qarqyny 102,7%, ınvestıtsııalar 104,4%, aýyl sharýashylyǵy 100,3%, qurylys 104,2%, turǵyn úıdi paıdalanýǵa berý 102,6%, kólik jáne qoıma jumysy 109,2% qurady. Oblysqa 325 mıllıard teńge ınvestıtsııa tartylsa, onyń ishinde quny 23 mıllıard teńge bolatyn 12 joba iske asyryldy. Nátıjesinde 486 jańa jumys ornyn quryldy.

Jyl sońyna deıin quny 68 mıllıard teńge bolatyn 18 ınvestıtsııalyq jobany iske asyrý mindeti tur. Al aýyl sharýashylyǵy salasyn qoldaý úshin respýblıkalyq jáne jergilikti bıýdjetterden 22,7 mıllıard teńge bólindi. Jarty jyldyń qorytyndysy boıynsha aýyl sharýashylyǵy óniminiń jalpy shyǵarylymy 130 mıllıard teńgeni qurady. Іri qara mal basy 7,3%, usaq mal basy 4,5%, jylqy 28%, túıe 13,2% kóbeıdi. Endi aýyl sharýashylyǵy óniminiń shyǵarylymyn 5% ulǵaıtý josparlandy.

Bıyl shaǵyn jáne orta bıznesti damytýǵa shamamen 12 mıllıard teńge bólý kózdelgen. Bul 3 myńǵa jýyq kásipkerlik sýbektilerin qoldaýǵa múmkindik beredi. Kásipkerlikti damytý jónindegi ulttyq joba aıasynda 1 myńnan astam shaǵyn jáne orta bıznes jobasy qoldaý tapty. Nátıjesinde jarty jyldyń qorytyndysy boıynsha oblysta jumys istep turǵan ShOB sýbektileriniń sany 14% artyp, shamamen 72 myńdy qurady. Jyl qorytyndysy boıynsha óńir ekonomıkasyndaǵy ShOB úlesi 22,3% deıin, jumys istep turǵan ShOB sýbektileriniń sany 73 myńnan astam birlikke deıin arttyrý josparlandy.

2022 jyly jergilikti, oblystyq, aýdandyq mańyzy bar 608,7 shaqyrym avtomobıl joldaryn jáne 165,7 shaqyrym kóshe-jol jelisin jóndeý josparlanǵan. Bul maqsatqa respýblıkalyq jáne jergilikti bıýdjetterden barlyǵy 37,8 mıllıard teńge qarastyrylǵan. Oblys ákimi 11 aýyldy ortalyqtandyrylǵan sýmen qamtamasyz etý josparlanyp, keshendi blok-modýlderdi ornatý jumystary júrgizilip jatqanyn, jyl basynan beri olar jeti shaǵyn aýylǵa ornatylǵanyn atap ótti. Bıyl gaz jelilerine 5,8 myńǵa jýyq adamdy qamtıtyn taǵy on aýyldyq eldimeken qosylatyn bolady.

Jyl basynan beri 376 myń sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 2,6% joǵary. Jyl sońyna deıin shamamen 1,3 mln sharshy metr turǵyn úı salý josparlandy.

Ońdasyn Orazalın áleýmettik sala jaıly aıta kele, jyl sońyna deıin jalpy somasy 406 mln teńgege Baıǵanın jáne Oıyl aýdandarynda 2 dárigerlik ambýlatorııa jáne Áıteke bı aýdanynda medıtsınalyq pýnkt paıdalanýǵa beriletinin jetkizdi. Budan bólek, qazirgi tańda jalpy quny 4,4 mlrd teńge bolatyn 3 920 oryndyq 14 mekteptiń qurylysy júrgizilip jatyr. Jyl sońyna deıin 2 myń oryndyq 6 mektep paıdalanýǵa beriledi.

Oblys ákimi: «Bizge halyqtyń ómir súrý sapasy men ál-aýqatyn jaqsartý, ekonomıkalyq ósimdi qamtamasyz etý jáne áleýmettik ınfraqurylymdy damytý jolynda zor jaýapkershilik júktelýde. Biz alǵa qoıǵan mindetterdi jaýapkershilikpen oryndaýda barlyq kúsh-jigerimizdi jumsaımyz»,- dep atap ótti.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT