AQSh ýnıversıtetimen sý resýrstaryn paıdalaný tehnologııalary pysyqtalyp jatyr - Úkimet
2022 jylǵy 20 mamyr 13:20

AQSh ýnıversıtetimen sý resýrstaryn paıdalaný tehnologııalary pysyqtalyp jatyr - Úkimet

NUR-SULTAN. QazAqparat – M.Dýlatı atyndaǵy Taraz óńirlik ýnıversıteti Nebraska shtatynyń ýnıversıtetimen (AQSh) birlesip, aýyl sharýashylyǵynda sý resýrstaryn paıdalaný tehnologııalaryn pysyqtap jatyr.

Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Sý sharýashylyǵynyń barlyq baǵyttary men deńgeıleri boıynsha bilikti kadrlar daıarlaý jaǵdaıyn jaqsartý úshin 2020 jyly M.Dýlatı atyndaǵy Taraz óńirlik ýnıversıtetinde «Sý sharýashylyǵy jáne tabıǵat ornalastyrý ınstıtýty» ashyldy. Instıtýttyń bakalavrıaty men magıstratýrasy aıasynda «Gıdrotehnıkalyq qurylys jáne qurylysjaılar», «Gıdrotehnıkalyq melıoratsııa», «Eldi mekenderdi sýmen jabdyqtaý jáne sý burý», «Sý resýrstaryn basqarý», «Melıoratsııa jáne sýarmaly eginshilik», al doktorantýra sheńberinde «Gıdrotehnıkalyq qurylys jáne qurylysjaılar» bilim berý baǵdarlamalary boıynsha oqytý júzege asyrylatynyn atap ótken jón», - dep atap ótedi Úkimet basshysy jaýabynda.

Álıhan Smaıylovtyń atap ótýinshe, atalǵan ınstıtýt bazasynda «Akademııalyq artyqshylyq ortalyǵy» ashyldy. Onyń negizgi mindeti - sý resýrstaryn basqarýdaǵy jańa tehnologııalardy zerdeleý jáne olardy oqý protsesine kiriktirý úshin ǵylymı uıymdarmen, sondaı-aq halyqaralyq oqý oryndarymen ózara is-qımyl jasaý.

«Atap aıtqanda, Nebraska shtatynyń ýnıversıtetimen (Amerıka Qurama Shtattary) yntymaqtastyq jolǵa qoıyldy. Onymen aýyl sharýashylyǵynda sý resýrstaryn paıdalaný tehnologııalary pysyqtalýda. Usynylǵan tehnologııalarmen tanysqannan keıin, olardy Qazaqstan jaǵdaıynda paıdalaný múmkindigi turǵysynan ǵylymı uıymdarmen talqylaǵannan keıin tıisti oqý baǵdarlamalary úshin modýlder ázirlenetin bolady», - dedi Álıhan Smaıylov.

Sonymen qatar ol Sý resýrstaryn basqarý júıesin damytýdyń 2030 jylǵa deıingi tujyrymdamasynyń jobasynda memlekettik basqarý júıesin jetildirý úshin ınnovatsııalyq pánderdi qosa otyryp, bilim berý baǵdarlamalaryn jańartý kózdelgenin aıtady.

«Atap aıtqanda, Eýropadaǵy qaýipsizdik jáne yntymaqtastyq uıymynyń qoldaýymen «Gıdrotehnıkalyq qurylysjaılar salý» bilim berý baǵdarlamasyn ázirleý júrgizilýde. Jalpy, sý qaýipsizdigin qamtamasyz etý máseleleri Úkimettiń erekshe baqylaýynda jáne qalyptasqan jaǵdaıdy eskere otyryp, qajetti is-sharalar qabyldanýda», - dedi Premer-Mınıstr.

Buǵan deıin elimizde sý resýrstaryn basqarý jónindegi jeke memlekettik organ qurý josparlanbaǵanyn habarlaǵan edik.



Uqsas jańalyqtar

Jańalyqtar

MURAǴAT