AQSh-tyń úzdik júzýshisi álem chempıonaty kezinde sýǵa batyp kete jazdady
2022 jylǵy 24 maýsym 12:21

AQSh-tyń úzdik júzýshisi álem chempıonaty kezinde sýǵa batyp kete jazdady

BÝDAPEShT. QazAqparat – Býdapeshte ótip jatqan sý sporty túrlerinen álem chempıonaty kezinde AQSh quramasynyń kórkem júzýshisi basseınde esinen tanyp qaldy. Ony jattyqtyrýshysy qutqardy, dep habarlaıdy QazAqparat NBC News basylymyna silteme jasap.

Eki dúrkin Olımpıada chempıony, 25 jastaǵy Anıta Alvares erkin baǵdarlamasyn aıaqtaǵannan keıin kenetten esinen tanyp, basseınniń túbine ketti. Buǵan deıin Ispanııa komandasynyń quramynda sınhrondy júzýden Olımpıadada tórt ret júlde alǵan AQSh quramasynyń jattyqtyrýshysy Andrea Fýentes sportshyny qutqarý úshin sýǵa sekirdi. Ol Alvaresti basseınnen alyp shyqty.

Anıtaǵa dereý alǵashqy medıtsınalyq kómek kórsetildi. Fýentestiń aıtýynsha, Alvarestiń densaýlyǵyna qaýip tónip turǵan joq. Dárigerler onyń júrek soǵý jıiligin, ottegi men qant deńgeıin, qan qysymyn jáne basqa da mańyzdy kórsetkishterin teksergen.

Fýentes Ispanııanyń «Marca» gazetine bergen suhbatynda sporttyq shara qutqarýshylarynyń eshqaısysy áreket etpegendikten, sýǵa sekirgenin aıtady.

Anıta Alvares alty kún ishinde tórt aldyn ala jáne úsh fınaldyq baıqaýda tamasha óner kórsetti. Ol jeke fınaldy jetinshi bolyp aıaqtady.

Foto: Dean Mouhtaropoulos/Getty Images
Uqsas jańalyqtar
Seriktester jańalyqtary

Jańalyqtar

Úrdis

MURAǴAT