AQSh-ta demalys kúnderi 10 óńirde jappaı atys boldy
2022 jylǵy 28 maýsym 16:21

AQSh-ta demalys kúnderi 10 óńirde jappaı atys boldy

VAShINGTON. QazAqparat – AQSh-ta demalys kúnderi bolǵan jappaı atys saldarynan jeti adam qaza taýyp, 46 adam jaraqat aldy, dep habarlaıdy QazAqparat ABC News basylymyna silteme jasap.

Qarý qoldanylǵan zorlyq-zombylyq muraǵatynyń málimetinshe, jumadan jeksenbige deıin AQSh-ta kem degende 10 jappaı atys bolǵan.

24 maýsymda Vırdjınııa shtatynyń Hoýpell qalasynda atys bolyp, eki jasóspirim qaza taýyp, ekeýi jaraqat aldy. Tergeý júrip jatyr, qamaýǵa alynǵandar týraly habarlanǵan joq.

25 maýsymda Nıý-Iorktegi Brýklınniń Bedford-Stıýıvezant aýdanynda tórt adam, onyń ishinde bir balaǵa oq tıgen. Oqıǵa turǵyn úıdiń mańynda káýap pisirý kezinde bolǵan.

Skýter mingen qarýly eki adam kelip, adamdarǵa oq jaýdyrǵan. Polıtsııa kúdiktilerdi izdep jatyr.

25 maýsym kúni Hıýstonda (Tehas shtaty) kámelet jasqa tolmaǵan tórt bala zardap shekti, onyń ekeýi qaıtys boldy.

Oqıǵa jalpy sany 10-ǵa jýyq adam jınalǵan eki top jastar arasyndaǵy janjaldan týyndaǵan. Eshkim ustalǵan joq.

25 maýsymda Mınnesota shtatynyń Mınneapolıs qalasynyń ortalyǵyndaǵy Stoýn-Arch kópiriniń janynda jappaı tóbeles kezinde tórt adam, onyń ishinde úsh jasóspirim oqqa ushty.

Oqıǵa kýágerleri oq jaýdyrǵan kúdikti oqıǵa ornynan kólikke minip qashyp ketkenin aıtty. Ustalǵandar týraly habarlanǵan joq.

Al 26 maýsymda Tehas shtatynyń San-Antonıo qalasyndaǵy «Manhetten» túngi klýbynyń turaǵynda atys bolyp, saldarynan bir adam qaza taýyp, úsheýi jaralandy. Polıtsııanyń málimetinshe, tártipsizdik áýeli túngi klýb ishinde bastalǵan.

Qalalyq polıtsııa atys oqıǵasyn tekserip jatyr.

Maýsymnyń 26-sy kúni Djordjııa shtatynyń Bleıklı qalasyndaǵy halyq tyǵyz ornalasqan túngi klýb pen qoǵamdyq tamaqtaný aýdanynda atys bolyp, bir adam qaza taýyp, altaýy jaralandy. Atysqa ne sebep bolǵany anyqtalyp jatyr, ustalǵandar joq.

26 maýsymda Nıý-Djersı shtatyna qarasty Paterson qalasynyń kóshesinde atys saldarynan 5 adam zardap shekti, onyń ishinde úsh jasóspirim bar. Qylmystyń sebebi anyqtalýda. Qamaýǵa alynǵandar joq.

26 maýsymda Vashıngton shtatynyń Takoma qalasynda segiz adam zardap shekti. Polıtseılerdiń aıtýynsha, mekemeniń artyndaǵy alleıada týyndaǵan janjal kezinde oqtyń daýsy shyqqan.

Zardap shekkenderdiń bári ómirine qaýip tóndirmeıtin jaraqat alyp, aýrýhanaǵa jatqyzyldy. Eshkim qamaýǵa alynǵan joq.

26 maýsymda Tehas shtatynyń Vaınona qalasynda bir top adam arasyndaǵy atys saldarynan bes adam zardap shekti, olardyń bireýiniń jaǵdaıy aýyr.

Tergeý barysynda atys keń jaıylymda bolǵan sharanyń kontserttik sahnasy mańyndaǵy tóbelesten bastalǵany anyqtaldy. Alǵashqy atystan keıin toptardyń keıbiri júgirip baryp, kire beristegi kúzetshilerge tapsyrǵan qarýyn aldy. Keıin ekinshi atys boldy.

26 maýsymda Vırdjınııa shtatynyń Saterlın qalasynda 100-den astam adam qatysqan saýyq keshinde atys bolyp, saldarynan bir adam qaza taýyp, jeteýi jaralandy. Atystyń sebebi áli anyqtalýda. Qamaýǵa alynǵandar joq.


Seriktester jańalyqtary

Jańalyqtar

Úrdis

MURAǴAT