AQSh Ashyq aspan shartynan shyqty

VAShINGTON. QazAqparat – Amerıka Qurama Shtattary jeksenbide resmı túrde 30-dan astam memleket múshe bolyp kelgen Ashyq aspan shartynan shyqty, dep habarlaıdy QazAqparat Euronews saıtyna silteme jasap.

AQSh mundaı jospary baryn osydan bir jyl buryn málimdegen edi: Vashıngton Reseıdi Kalınıngrad oblysyna, Grýzııa shekarasyna jáne iri áskerı jattyǵý aımaqtaryna ushýǵa tyıym saldy dep aıyptady.

Osylaısha Reseı shartty buzǵanymen qoımaı, AQSh-tyń ınfraqurylymy jaıly aqparat jınaý úshin ony teris mánde paıdalandy degen bolatyn.

Shartqa 1992 jyly qol qoıyldy. Shart boıynsha múshe-elder bir-biriniń aýmaǵyn barlaýǵa, áskerleriniń ornalasqan jerin jáne qozǵalysyn baqylaı alady.

Osy arqyly áskerdiń qarýlanýyna qoıylatyn shekteýlerdiń oryndalýy baqylanady. Osyndaı barlaýdyń nátıjesinde alynǵan aqparat kelisimniń barlyq qatysýshysyna qoljetimdi.

Osyǵan baılanysty birneshe kún buryn Reseı SІM Shartta qalǵan elder Vashıngtonmen derekterdi bólisýdi toqtatady jáne Eýropa elderindegi amerıkalyq áskerı bazalar sharttan tys qalmaıdy dep málimdegen bolatyn.