Aqmolada júrip kele jatqan kóliktiń tirkemesi órtenip ketti

KÓKShETAÝ. QazAqparat - Aqmola oblysynda avtojoldyń boıynda «fýranyń» tirkemesi órtenip ketti, ony júrgizýshige oqıǵa kýágerleri aıtyp eskertti, dep habarlaıdy QazAqparat tilshisi.

Atalmysh oqıǵanyń beınejazbasy áleýmettik jelidegi atbasar_live paraqshasynda jarııalandy.

«Búgin Atbasar mańyndaǵy tas joldyń boıynda júrip kele jatqan fýranyń tirkemesinen órt shyqty. Oqıǵa kýágeri der kezinde júrgizýshige eskertti. Barlyǵymyz tirkemeni aǵytyp, fýrany órtten aman alyp qaldyq. Avtokólik shınalary tıelgen tirkeme túgel janyp ketti», - delingen beınejazbada.

Aqmola oblystyq TJD málimetinshe, 7 qarasha kúni saǵat 15:14 shamasynda «Almaty-Ekaterınbýrg» tasjolynyń 1260-shaqyrymynda júk kóliginiń tirkemesi órtengeni týraly aqparat túsken.

«Órt saǵat 15:40-ta aýyzdyqtalyp, 16:20-da tolyq sóndirildi. Qaza tapqandar men zardap shekkender joq. Órttiń sebebi anyqtalýda», - dep tolyqtyrdy vedomstvodan.