Aqmolada 24 jastaǵy kelinshek ákesiniń atynan jasyryn nesıe alyp, tólemeı qoıǵan
2022 jylǵy 28 qańtar 01:48

Aqmolada 24 jastaǵy kelinshek ákesiniń atynan jasyryn nesıe alyp, tólemeı qoıǵan

KÓKShETAÝ. QazAqparat - Aqmola oblysynyń Býrabaı aýdanynda 24 jastaǵy áıel ákesine 1 mıllıon teńgege jýyq nesıe rásimdedi, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, 24 qańtarda Býrabaı aýdandyq polıtsııa basqarmasynyń kezekshi bólimine jergilikti turǵynnan aryz túsken.

Er adam bankterdiń birinde onyń atyna nesıe rásimdelgenin aıtty.

«Ol bankte bereshektiń jalpy somasy 1 mıllıon 400 myń teńgeni quraǵanyn aıtty. Jedel-izdestirý is-sharalary barysynda kúdikti anyqtaldy, ol aryz berýshiniń 24 jastaǵy qyzy bolyp shyqty», - dep túsindirdi vedomstvodan.

Anyqtalǵandaı, qyzy ákesin ekinshi deńgeıdegi bankterdiń birinde jeke kabınet ashýǵa kóndirip, sodan keıin onyń atyna karta men nesıe alǵany belgili boldy.

Qylmystyq kodekstiń 190-baby 2-bóligi «alaıaqtyq» boıynsha sotqa deıingi tergeý amaldary júrip jatyr.

«Ózińizdiń jeke derekterińizdi, ásirese jeke basty kýálandyratyn qujattardyń fotosýretterin jáne kóshirmelerin jáne banktik kartochkalardy bógde adamdardyń qoly jetpeıtin jerde saqtaý qajet, qandaı da bir alaıaqtyq anyqtalǵan jaǵdaıda, ózińizdiń banktik shottaryńyzdy dereý tekserip, tıisti organdarǵa habarlasyńyz»,-dep tolyqtyrdy vedomstvodan.



Jańalyqtar

MURAǴAT