«Aqmola juldyzdary-2021» oblystyq shyǵarmashylyq baıqaýynyń jeńimpazdary marapattaldy
2021 jylǵy 25 jeltoqsan 03:31

«Aqmola juldyzdary-2021» oblystyq shyǵarmashylyq baıqaýynyń jeńimpazdary marapattaldy

KÓKShETAÝ. QazAqparat – Aqmola oblysynda «Aqmola juldyzdary-2021» oblystyq kórkemónerpazdar halyq shyǵarmashylyǵy baıqaýynyń qorytyndy gala-kontserti ótip, júldegerler marapattaldy, dep habarlaıdy QazAqparat tilshisi.

Baıqaý «Rýhanı jańǵyrý» respýblıkalyq baǵdarlamasy «Rýhanı qazyna» kishi baǵdarlamasynyń «Óńirlik mádenıet, dástúrler men qundylyqtar» bazalyq jobasyn júzege asyrý aıasynda QR Táýelsizdiginiń 30 jyldyǵyna arnaldy.

«Dástúrli baıqaý óńirimizdiń mádenı ómirinde ózindik orny bar eń iri joba. Baıqaý oblysymyzdyń kórkemónerpaz ártisterine túrli janrlarda talanttaryn kórsetýge, shyǵarmashylyq áleýetin ashýǵa múmkindik beredi. Sondaı-aq mádenıetti ózara baıytýdyń, qoǵamdy toptastyrýdyń, ulttyń genetıkalyq kodyn: tildi, rýhanılyqty, dástúrdi jáne Qazaqstan halqynyń mádenı murasyn saqtaýdyń jarqyn úlgisi bolyp tabylady», - dedi oblystyq Mádenıet, arhıvter jáne qujattamalar basqarmasynyń baspasóz qyzmetindegiler.

Gala-kontsert aıasynda «Táýelsizdik – tuǵyrym» atty sheberlerdiń úzdik týyndylary usynylǵan sándik-qoldanbaly shyǵarmashylyq kórmesi uıymdastyryldy. Kórermender qaıta jańǵyrǵan halyqtyq qolóner buıymdary men tehnıkalaryna asqan qyzyǵýshylyq tanytty. Kórmege oblys aýdandarynyń qolóner sheberleri men sýretshileriniń 200-den astam týyndysy qoıyldy. Halyqaralyq, respýblıkalyq kórmelerdiń júldegeri, Shortandy aýdanynyń qurmetti azamaty, sýretshi, qolóner sheberi Bektas Kárimulynyń qolynan shyqqan týyndylar kópshiliktiń tańdanysyn týdyrdy. Sondaı-aq bıyl ǵana qala mártebesin alǵan Qosshy qalasynyń ulttyq aspaptardy jasaýshy sheberi Nurjan Dilmanovtyń týyndylary da kórermen kózaıymyna aınaldy. Býrabaı aýdany sheberleri usynǵan ulttyq kıim defılesi kórmege aıyryqsha sán berdi.

Óńirdiń úzdik shyǵarmashylyq ujymdary men oryndaýshylarynyń óneri de kontserttik baǵdarlamaǵa endi. Sahna tórinde óner kórsetken «Asyl mura», «Araı» (Kókshetaý) halyqtyq bı ansamblderi, «Aqbulaq» (Ereımentaý) qobyzshylar ansambli, «Dýdaraı» (Qorǵaljyn) halyqtyq folklorlyq ansambli, «Art-lojkı» (Aqkól) ansambli, halyqtyq balet stýdııasy (Stepnogor), «Malenkaıa ledı» (Atbasar) sán teatry, ulttyq kıimdegi defıle (Býrabaı), «Rodnıchok» (Atbasar) bı ujymy tárizdi ónerpazdar kórermen kóńilinen shyqty. Bıylǵy jyldyń jańalyǵyn Qosshy qalasynan jas ánshi Eset Áljan men Aýǵantaı Isa jáne Arshaly aýdanynan Súleımen Oljasuly dep ataýǵa bolady.

Oblystyq halyq shyǵarmashylyǵy baıqaýynyń aýdandyq jáne qalalyq gala-kontsertteriniń qorytyndysy boıynsha oblystyq mańyzy bar qalalar, ortalyqtary qalalar bolyp tabylatyn aýdandar, ortalyqtary aýyldar bolyp tabylatyn aýdandar tárizdi úsh top boıynsha júldeli oryndar anyqtaldy.

«Aqmola juldyzdary-2021» oblystyq kórkemónerpazdar baıqaýynda úzdik óner men shyǵarmashylyq jetistikteri úshin Qorǵaljyn, Jaqsy, Esil, Atbasar aýdandary ІІІ dárejeli dıplommen jáne baǵaly syılyqpen marapattaldy. ІІ dárejeli dıplommen jáne baǵaly syılyqpen Tselınograd, Egindikól, Jarqaıyń, Aqkól aýdandary men Qosshy qalasy marapattaldy. I-shi dárejeli dıplommen jáne baǵaly syılyqpen Zerendi, Býrabaı aýdandary jáne Stepnogor qalasy marapattaldy.

Baıqaýdyń bas júldesin Ereımentaý, Sandyqtaý aýdandary men Kókshetaý qalasy ıelendi.



Jańalyqtar

MURAǴAT