Aqmola oblysynyń Makınsk qalasynda jańa jylý qazandyǵy salynady

MAKINSK. QazAqparat – Aqmola oblysynyń Makınsk qalasynda jańa jylý qazandyǵy salynady. Qalada 20 jyldan astam ýaqyt ortalyqtandyrylǵan jylý júıesine qosylmaı, qıyndyq kórgen kóppáterli úılerde turatyn turǵyndardyń máselesi sheshiledi, dep habarlaıdy QazAqparat tilshisi oblystyq energetıka jáne turǵyn úı-kommýnaldyq sharýashylyq basqarmasyna silteme jasap.

Uqsas jańalyqtar

Óńirlerde  jylytý maýsymyna daıyndyq barysy qandaı

Vedomstvonyń málimetinshe, jylý qazandyǵynyń qurylys jobasy aımaq basshysy Ermek Marjyqpaevtyń qoldaýymen júzege asyrylmaq.

«Jobanyń quny - 2 mıllıard teńge. Qarjy bolmaǵan soń bul jobany tolyq júzege asyrý múmkindigi bolmady. Búgingi tańda bıýdjetten qarjy túse bastady. Sol sebepti, joba júzege asyrylatyn bolyp otyr. Sondaı-aq, qazandyqty otyn únemdeý túrine aýystyrý týraly sheshim qabyldandy. Bul qalanyń jylý júıesi úshin dotatsııa kólemin kemitýge múmkindik beredi», - deıdi vedomstvodan.

Aqmola oblystyq energetıka jáne turǵyn úı-kommýnaldyq sharýashylyq basqarmasynan atap ótkendeı, budan bólek, Makınsk qalasynda taǵy bir blok-modýldi qazandyq salynady. Bul týraly aımaq basshysy Ermek Marjyqpaev Bulandy aýdanynyń ákimdigi men oblystyq energetıka jáne turǵyn úı-kommýnaldyq sharýashylyq basqarmasyna tapsyrma berdi.

«Jylý qazandyǵy qala ortasyndaǵy ondaǵan kópqabatty turǵyn úı men áleýmettik nysandardy ortalyqtandyrylǵan jylý júıesimen qamtýǵa qaýqarly. Aýdan ákimdiginiń dereginshe, 2020-2021 jyldardaǵy jylý maýsymyna deıin jańa qazandyq salynyp bolady», - dep tolyqtyrdy vedomstvodan.