Aqmola oblysyndaǵy zamanaýı sút ónimderi fermasy qalaı jumys isteıdi
2021 jylǵy 29 qarasha 20:02

Aqmola oblysyndaǵy zamanaýı sút ónimderi fermasy qalaı jumys isteıdi

NUR-SULTAN. QazAqparat – Aqmola oblysy Býrabaı aýdany Atameken aýylynda zamanaýı sút jáne sút ónimderi fermasy jumys istep tur. Jergilikti jeke kásipker óz isin 2015 jyly qolǵa alyp, búginde halyqty sút jáne sút ónimderimen qamtamasyz etip otyr. «Abdrahmanov» jeke kásipkerlik fermasynyń basshysy Bolat Ábdirahmanov atalǵan kásiporyn jumysy týraly aıtyp berdi, dep habarlaıdy QazAqparat tilshisi.

«Búginde bizdiń fermada 480 sıyr jáne 109 jylqy bar. Basynda olardyń sany 200 ǵana bolǵan, keıin ony ósirý kerek degen sheshimge keldim. Agronesıelik korporatsııasynyń «Agrokásip-2020» baǵdarlamasy arqyly 88 mln teńge nesıe alyp, oǵan Chehııadan 96 bas iri qara malyn satyp aldym. Onyń 60 basy monbelıard tuqymy jáne 36 iri qara mal sımmental tuqymyna jatady. Sondaı-aq, «Yrys» baǵdarlamasy boıynsha 82 mln teńge kóleminde nesıe aldyq, ol qarjyǵa bıyl jyl sońyna deıin Slovakııadan 53 iri qara mal ákeletin bolamyz. Odan bólek, qarjylyq qoldaý qory arqyly «Sybaǵa» baǵdarlamasy aıasynda Chehııa men Slovakııadan taǵy 109 bas iri jetkizildi», - dedi Bolat Ábdirahmanov BAQ ókilderine arnalǵan baspasóz týry barysynda.

Onyń aıtýynsha, atalǵan kásiporyn sút jáne sút ónimderimen jergilikti jáne kórshi oblystardy qamtyp otyr. Jáne ortasha eseppen bir sıyr 28 lıtr sút beredi.

«Fermada 20-dan astam adam jumys isteıdi. Kásiporyn jumysy tolyq avtomattandyrylǵan, bir mezette 20 sıyr saýylady. Sonymen qatar bizdiń malǵa jem-shóp daıyndaıtyn óz zaýytymyz bar. Zaýytta zamanaýı nemis qurylǵysy ornatylǵan, ol arqyly qajetti mólsherde paıdaly mal azyǵyn ázirleýge bolady», - deıdi ol.

Sondaı-aq, 2015 jyly iske qosylǵan fermanyń basshysy memleket tarapynan qoldaýdyń baryn tilge tıek etti.


Jańalyqtar

Úrdis

MURAǴAT