Aqmola oblysynda búginginiń batyrlaryn dáripteıtin shara qolǵa alynýda
2022 jylǵy 19 qańtar 18:58

Aqmola oblysynda búginginiń batyrlaryn dáripteıtin shara qolǵa alynýda

KÓKShETAÝ. QazAqparat - Aqmola oblysynyń «Rýhanı jańǵyrý» óńirlik jobalyq keńsesi «Aramyzdaǵy batyrlar» jobasyn júzege asyrýda. Joba búginginiń batyrlaryn dáripteýge, olardyń erlikterin kópshilikke úlgi etý maqsatynda qolǵa alynyp otyr, dep habarlaıdy QazAqparat tilshisi.

«Rýhanı jańǵyrý» óńirlik jobalyq keńsesiniń basshysy Erlan Muhamedıarov atap ótkendeı, joba aıasynda qyzmettik mindetterin oryndaý barysynda erlik tanytqan qutqarýshylar men polıtsııa qyzmetkerleri, koronavırýs ınfektsııasyna qarsy kúreske jumyldyrylǵan medıtsına mamandarymen beınesuhbattar júrgizilip, olar jaıly beınerolıkter áleýmettik jelilerde taratylyp otyratyn bolady.

«Aramyzdaǵy batyrlar» jobasy qazaq halqynyń «batyrlyq ınstıtýtyn» nasıhattaýǵa arnalǵan. Tarıhtaǵy batyr babalarymyzdyń erlik joly jelisin úzbegenin dáleldep kele jatqan erjúrek zamandastarymyz qazirgi kúnde de bizdiń aramyzda bar» - deıdi Erlan Muhamedıarov.

Jobanyń qanatqaqty týyndysy Málik Ǵabdýllın atyndaǵy azamattyq qorǵanys akademııasynyń kýrsanttaryna arnalyp otyr. Akademııa kýrsanttary tótenshe jaǵdaı kezinde polıtsııa qyzmetkerlerimen birlesip, óńirde qoǵamdyq tártipti saqtaýǵa úles qosty.

Kóshe kúzetine atalmysh bilim ordasynyń 4 kýrs kýrsanttary, jalpy sany 148 adam tartyldy.

Aıta ketsek, Aqmola oblysy ishki saıasat basqarmasyna qarasty «Rýhanı jańǵyrý» óńirlik jobalyq keńsesi joba jumysyn jyl boıy jalǵastyryp otyrmaq. Otanǵa qaltqysyz qyzmet etip júrgen azamattardyń márttigin úlgi etýdi kózdeıtin joba aldaǵy ýaqytta qoǵam ómiriniń ár salasyn qamtıtyn bolady.


Jańalyqtar

MURAǴAT