Aqmola oblysynda 120 gaz quıý stantsııasy belgilegen baǵaǵa gaz quıýda
2022 jylǵy 10 qańtar 11:01

Aqmola oblysynda 120 gaz quıý stantsııasy belgilegen baǵaǵa gaz quıýda

KÓKShETAÝ. QazAqparat - Kókshetaýda aımaq basshysy Ermek Marjyqpaevtyń tóraǵalyǵymen Aqmola oblysynyń óńirlik jedel shtabynyń otyrysy ótti, dep habarlaıdy QazAqparat tilshisi ákimdiktiń baspasóz qyzmetine silteme jasap.

Otyrys barysynda Ermek Marjyqpaev oblystaǵy jaǵdaı turaqty ekenin atap ótti.

«Barlyq quqyq qorǵaý, memlekettik organdar, tótenshe jaǵdaılar jáne qorǵanys departamenti qyzmetkerleriniń, qoǵam ókilderiniń úılesimdi jumysynyń arqasynda óńirdegi ahýal turaqtanýda. Búgin polıtsııa qyzmetkerlerine janqııarlyǵy úshin erekshe alǵysymdy bildirgim keledi. Olar óz ómirin qaterge tigip, quqyq tártibin qorǵaýda», - dep tolyqtyrdy óńir basshysy.

Ákimniń aıtýynsha, óńirde qolma-qol aqshany alý jáne taýar satyp alý máselesi sheshildi. Bul máseleni sheshý úshin Halyq banki Polıtsııa departamentiniń kómegimen 7 qańtardan bastap Kókshetaý qalasy boıynsha bankomattardy toltyrýdy bastady. Kesheden bastap aýdan ortalyqtaryndaǵy bankomattardy toltyrý júzege asyrylýda. Sonymen qatar, Sberbanktiń 4 bankomaty qolma-qol aqshamen qamtamasyz etilgen. Jaqyn kúnderi basqa banktermen de másele pysyqtalatyn bolady. Saýda jelisinde birinshi qajetti quraldar men azyq-túlik ónimderi jetkilikti.

Otyrys qorytyndysy boıynsha oblys basshysy jaýapty qyzmetterge atap aıtqanda, josparlanǵan jerlerde blokpostardy ornatý aıaqtalǵannan keıin, áleýmettik mańyzy bar taýarlarǵa, kommýnaldyq qyzmetterge, kómirge, JJM-ge, gazǵa jáne basqalarǵa baǵa saıasatyn saqtaý boıynsha baqylaýdy kúsheıtýge tapsyrmalar berdi.

Aıta keteıik, óńirde gaz baǵasy 70 teńge kóleminde belgilengen. Oblys ortalyǵynan 200 shaqyrymnan astam qashyqtyqty esepke alǵanda, baǵa 75 teńgeni quraıdy. Búgingi kúni oblysta 120 gaz quıý stantsııasy básekelestikti qorǵaý jáne damytý agenttigi belgilegen baǵalar boıynsha suıytylǵan gazdy quıýdy júzege asyrýda.


Jańalyqtar

MURAǴAT