Aqmola oblysynda 100 myńnan astam bala úıirmeler men sektsııalarǵa barady
KÓKShETAÝ. QazAqparat – Aqmola oblysynda balalardyń shyǵarmashylyq daǵdylardy damytýǵa erekshe mán berilýde. Óńirdegi ár balanyń sabaqtan tys úıirmeler men sektsııalarǵa qatysý oblys basshylyǵynyń baqylaýynda, dep habarlaıdy QazAqparat tilshisi oblystyq ishki saıasat basqarmasyna silteme jasap.
Oblystyq bilim basqarmasynyń málimetinshe, óńirde jyl saıyn qosymsha bilim berý uıymdarynyń sany artyp keledi.
«Oblysta qosymsha bilim berýmen barlyǵy 106871 oqýshy qamtylǵan. Onyń ishinde 20453 bala mektepten tys jumys ortalyqtary, shyǵarmashylyq úıleri tárizdi 51 uıymda úıirme jumystarymen aınalysady. Sondaı-aq, 86 418 bala mektep janyndaǵy úıirmeler men sektsııalarǵa barady», - dedi bilim basqarmasyndaǵylar.
Basqarma basshylyǵy atap ótkendeı, qysqy demalys kezinde de balalardyń bos ýaqytynda qosymsha úıirmelerge barýy toqtaǵan joq. Qysqy demalys týraly tujyrymdamaǵa sáıkes, basqarma oblystaǵy epıdemıologııalyq jaǵdaıdy jáne tárbıe jumysynyń 8 baǵytyn eskere otyryp, jumys josparyn jasady.
Demalys kezinde qosymsha bilim berý uıymdary balalarmen «Qysqy qııal», «Qysqy vernısaj» qysqy art-chellendji, «Sýretshiler shyǵarmashylyǵyndaǵy qys», «Ertegide qonaqta» atty baıqaýlar, týrnırler, zııatkerlik oıyndar, taza aýadaǵy kvest oıyndar jáne onlaın formattaǵy túrli jumystardy ótkizdi.
Kókshetaý, Stepnogor qalalary men Ereımentaý, Bulandy aýdandarynyń mektepterinde «Oqıtyn ult» jobasy boıynsha jumystar jalǵasýda. Shtattyq rejımde eń iri obekti – Kókshetaýdaǵy «Bolashaq saraıy» mekemesi jumysy isteýde. Onda kún saıyn ótkizilip turatyn 111 úıirme men sektsııalarǵa 3000-nan astam bala barady.
«Biz jańadan keletin tárbıelenýshilerge árdaıym qýanyshtymyz, olarǵa áleýetin ashýǵa jáne darynyn ózin-ózi damytýǵa kómektesýge tyrysamyz. Mekeme qyzmetiniń az ýaqyty ishinde bizdiń oqýshylar túrli baıqaýlar men jarystarda jeńimpaz atandy», - dep atap ótti «Bolashaq saraıy» mekemesiniń dırektor Aınagúl Baltasheva.
Aıta ketsek, óńirde 552 jalpy bilim beretin mektepte 133103 oqýshy bilim alýda.
