Ákimder men mınıstrlerdiń halyqpen kezdesýlerin baǵalaý ólshemsharty ázirlenedi
2022 jylǵy 9 tamyz 12:05

Ákimder men mınıstrlerdiń halyqpen kezdesýlerin baǵalaý ólshemsharty ázirlenedi

NUR-SULTAN. QazAqparat – Búgin Úkimet otyrysynda Premer-Mınıstr Álıhan Smaıylov ortalyq jáne jergilikti atqarýshy organdar basshylarynyń halyqpen kezdesýine qatysty tapsyrmalar berdi, dep habarlaıdy QazAqparat tilshisi.

«Ortalyq jáne jergilikti atqarýshy organdardyń basshylary máselelerdi jedel sheshýge basa nazar aýdara otyryp, ótkiziletin kezdesýlerdiń nátıjeligin arttyrsyn. Kóterilgen máselelerdi sheship, nysanaly toptarmen turaqty kezdesýler ótkizýdi tájirıbege alý kerek. Ulttyq ekonomıka mınıstrligi men Aqparat mınıstrligi halyq kóteretin barlyq máselelerdi júıelesin jáne osy problemalardy sheshý jónindegi tıisti is-sharalar josparyn bekitsin», - Á. Smaıylov.

Úkimet basshysy óńir ákimderi respýblıkalyq bıýdjet esebinen qarjylandyrylatyn jobalar boıynsha tıisti qujattardy daıyndaýdy tezdetip, bıýdjettik ótinimderdi ortalyq memlekettik organdarǵa engizýi tıis ekenin atap ótti.

Sonymen qatar, respýblıkalyq jáne jergilikti bıýdjetterdiń jobalaryn qalyptastyrý nemese naqtylaý kezinde kezdesýlerde halyq kóteretin máselelerdi eskerý qajet.

«Ulttyq ekonomıka, Aqparat jáne qoǵamdyq damý mınıstrlikteri memlekettik organdardyń tıimdiligin baǵalaý úshin ákimder men mınıstrlerdiń halyqpen kezdesýlerin baǵalaý krıterıılerin ázirlesin. Nátıjesin Úkimette júıeli túrde qaraıtyn bolamyz», - dedi Premer-Mınıstr.

Budan buryn habarlanǵandaı, Úkimet basshysy keıbir óńirlerde basshylar halyqpen kezdesýdiń jańa formatyna beıimdelmeı, eski súrleýden shyǵa almaı otyrǵanyn synady.

Úkimet otyrysynda bıyldan bastap ortalyq jáne jergilikti atqarýshy organ basshylarynyń óńirlerge baryp, halyqpen júzbe-júz kezdesý ótkizýdiń jańa tártibi júzege asyrylyp jatqany aıtyldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT