Air Astana basshysy reısterdiń keshigýi nege jıilegenin túsindirdi
2022 jylǵy 11 tamyz 18:19

Air Astana basshysy reısterdiń keshigýi nege jıilegenin túsindirdi

ALMATY. QazAqparat – BAQ ókilderi úshin uıymdastyrylǵan brıfıngide Air Astana kompanııalar tobynyń prezıdenti Pıter Foster reısterdiń jıi keshigý sebepterin túsindirdi, dep habarlaıdy QazAqparat tilshisi.

Kompanııa basshysynyń aıtýynsha, reısterdi ýaqtyly oryndaý kórsetkishteri sońǵy 6 aptada 85 paıyzdan 74 paıyzǵa deıin tómendegen.

«Biz qazir birneshe qıyn máselege tap boldyq. Onyń biri – áýejaılarda qyzmet kórsetýge baǵyttalatyn qajetti resýrstardyń bolmaýy. Demek, bul másele tek Eýropa elderinde ǵana emes, Qazaqstanda da bolyp jatyr. Sonymen qatar, tehnıkalyq qıyndyqtar bar. Atap aıtqanda, bizdiń «Airbus A320 neo» ushaqtaryndaǵy «Pratt&Whitney» qozǵaltqyshtarynda aqaýlar boldy. Qajetti bólshekterdi satyp alǵanymyzben, ony jetkizý múmkin bolmaı tur. Bul – avıatsııa salasynda jıi kezdesetin másele. Reısterdiń keshigýine sebep bolyp otyrǵan taǵy bir faktor – qustardyń ushaqtarǵa soǵylýy. Bıyl jyl basynan beri osyndaı 63 jaǵdaı tirkeldi», - dedi Air Astana kompanııalar tobynyń prezıdenti.

Sóz sońynda Pıter Foster keshikken reıster úshin jolaýshylardan keshirim surady.

Eske salaıyq, buǵan deıin Air Astana reıs keshiktirip, jolaýshylar quqyǵyn buzǵany úshin bıyl 9 mln teńge aıyppul tólegenin habarlap edik.

Azamattyq avıatsııa komıteti keshikken reıster úshin salynatyn aıyppul kólemin arttyrýdy usynyp otyr.


Seriktester jańalyqtary

Jańalyqtar

Úrdis

MURAǴAT