Aıda Balaeva: Qaıyrymdylyq – azamattyq qoǵamnyń kemeldenýi
2021 jylǵy 3 jeltoqsan 15:51

Aıda Balaeva: Qaıyrymdylyq – azamattyq qoǵamnyń kemeldenýi

PAVLODAR. QazAqparat – Qaıyrymdylyq degenimiz – azamattyq qoǵamnyń kemeldenýi. Bul týraly «Jomart júrek» syılyǵy laýreattaryn marapattaý sharasynda QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Búgin sondaı-aq, elimizde jyl saıyn ótkiziletin «Jomart júrek» respýblıkalyq syılyǵynyń ıegerlerin biletin bolamyz. «Jomart júrek» bul – qaıyrymdylyq jasaý baǵytynda aýqymdy isterdi atqaryp júrgen uıymdardy anyqtap, olardy halyqqa tanystyrý maqsatynda beriletin arnaıy marapat. Bul - sondaı-aq, óńirlerdi damytýǵa, qamqorlyq qundylyqtary men qaıyrymdylyq ıdeıalaryn keńinen nasıhattaýǵa, muqtaj jandarǵa kómek berýge daıyn azamattardyń jaqsy isterin dáripteýge múmkindik beretin biregeı alań. 2018 jyly jyldan beri bul ataýly syılyq – 125 adamǵa berildi», - dep atap ótti mınıstr.

Onyń aıtýynsha, bıylǵy «Jomart júrek» syılyǵynyń ıegerlerin táýelsiz sarapshylyq komıssııa elimizdiń búkil óńirinen túsken 100-den astam ótinishtiń ishinen iriktep alǵan.

«Osylaısha, onlaın daýys berý jáne esep komıssııasynyń sheshiminiń qorytyndysynda 5 atalym boıynsha 51 jeńimpaz anyqtaldy. Biraq, barlyq ýaqytta da eń basty jeńimpaz bizdiń qaıyrymdy júregimiz ben ystyq yqylasymyz bolyp qala beredi. Óıtkeni, qaıyrymdylyq – azamattyq qoǵamnyń kemeldenýi»,- dedi Aıda Balaeva.

Mınıstr elorda men iri qalalarda ǵana emes, elimizdiń shalǵaı eldi mekenderinde de qaıyrymdylyqpen aınalysýdy ómiriniń mánine aınaldyrǵan adamdardyń kóp ekenin basa aıtty.

«Aınalamyzdy shýaqqa bólep, bir-birimizge qýanysh syılar meıirimdiligimiz sarqylmasyn, jaqsy isterimiz taýsylmasyn! Aldymyzda mol jetistikter kútip turǵanyna kámil senimdimin. Barshańyzǵa jaqsylyq, jetistik, tabys tileımin!», - dep túıindedi sózin Aıda Balaeva.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT