Ahmet Baıtursynulynyń týǵan aýylynda mýzeı-úı salynady
2022 jylǵy 28 maýsym 11:48

Ahmet Baıtursynulynyń týǵan aýylynda mýzeı-úı salynady

NUR-SULTAN. QazAqparat – Ahmet Baıtursynulynyń týǵan aýylynda mýzeı-úı salynady. Bul týraly QazAqparat tilshisiniń saýalyna jaýap bergen Qostanaı oblystyq Mádenıet basqarmasynyń basshysy Erlan Qalmaqov málim etti.

«Jyldyń basynda jergilikti halyqpen kezdesken kezde oblys basshylaryna osy toıdan keıin estelik bolyp qalatyn mýzeı-úı salynsa, aýylǵa jol tartylsa degen tilek aıtyldy. Qazirgi ýaqytta jańadan úı salýǵa baılanysty qurylys jumystaryna konkýrs ótkizilip jatyr. Jýyrda merdiger anyqtalyp, jańa mýzeı-úıdiń qurylysy bastalady. Bul tek qańyrap turǵan bos úı bolmaıdy. Onyń ishinde jabdyqtar, Ahmet atamyzdyń ómiri men týǵan jerine baılanysty estelikterden habardar beretin dúnıeler qoıylady», - dep josparlarymen bólisti basqarma basshysy.

Erlan Qalmaqov mýzeı-úıdiń qurylysy qyrkúıek aıyna deıin aıaqtalatynyn jetkizdi. Sondaı-aq ol Ahmet Baıtursynulynyń týǵan úıi buzyldy degen aqparatqa qatysty pikir bildirdi.

«Bul jerde anyqtap alatyn jaǵdaı bar. Bul Ahmet Baıtursynulynyń dál týǵan úıi emes. Ol týraly tarıhı naqtylanǵan aqparat ta joq. 2009 jyly Sarytúbek qonysyndaǵy eski úılerdiń negizinde shamamen osy Ahmettiń úıi bolýy kerek-aý, degen kópshiliktiń yqylasymen kótergen úı. Ol úı aýyldyń ákimi jáne turǵyndardyń kómegimen salynǵan», - dep túsinik berdi Erlan Qalmaqov.

Eske sala keteıik, ult ustazynyń 150 jyldyq mereıtoıy qarsańynda Qostanaı halyqaralyq áýejaıyna Ahmet Baıtursynulynyń esimi berildi.


Uqsas jańalyqtar

Jańalyqtar

Úrdis

MURAǴAT