Ádiletti Qazaqstanda polıtseılerdiń ozbyrlyǵyna, biliksiz prokýrorlar men birjaqty sýdıalarǵa jol berilmeıdi
2022 jylǵy 6 maýsym 20:23

Ádiletti Qazaqstanda polıtseılerdiń ozbyrlyǵyna, biliksiz prokýrorlar men birjaqty sýdıalarǵa jol berilmeıdi

NUR-SULTAN. QazAqparat - Elimizdiń ekonomıkalyq resýrstaryn shaǵyn ǵana toptyń qolyna shoǵyrlandyryp, olarǵa artyqshylyq bergen zańnamany qaıta qaraý qajet. Bul týraly QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Elimizdiń ekonomıkalyq resýrstaryn shaǵyn ǵana toptyń qolyna shoǵyrlandyryp, olarǵa artyqshylyq bergen zańnamany qaıta qaraý qajet. Elden jylystatylǵan qarjyny jáne zańsyz jekeshelendirilgen aktıvterdi memlekettiń ıeligine qaıtarý jóninde Mekemearalyq komıssııa quryldy. Bul úshin men arnaıy Jarlyqqa qol qoıdym», - dedi Memleket basshysy otandyq telearnalar arqyly Qazaqstan halqyna arnaǵan úndeýinde.

QR Prezıdenti adam quqyǵy men bostandyǵyn qorǵaý júıesin keshendi túrde kúsheıtýge negizdelgen baǵdar jalǵasa beretindigin basa aıtty.

«Quqyqtyq reforma aıasynda Konstıtýtsııalyq sot qaıta qurylady. Onyń qaýlylaryna jedel áreket etý tetigin engizý qajet. Sonda azamattarymyz osy asa mańyzdy ınstıtýt qyzmetiniń paıdasyn sezine alady. Jańa, Ádiletti Qazaqstanda polıtseılerdiń ozbyrlyǵyna, biliksiz prokýrorlar men birjaqty sýdıalarǵa jol berilmeıdi. Qoǵam quqyq qorǵaý jáne sot júıesiniń shyn máninde ózgergenin qalaıdy. Men elimizdi damytýdyń osy jáne basqa da máseleleri boıynsha naqty sheshimderdi qyrkúıek aıynda ótetin Parlamenttiń kezekti sessııasynyń ashylýynda aıtamyn», - dedi Qasym-Jomart Toqaev.


Jańalyqtar

Úrdis

MURAǴAT