Ádilet mınıstrligi  jańa 4 partııanyń qujatyn tekserip jatyr
2022 jylǵy 18 sáýir 12:30

Ádilet mınıstrligi jańa 4 partııanyń qujatyn tekserip jatyr

NUR-SULTAN. QazAqparat – QR Ádilet mınıstri Qanat Mýsın 4 bastamashy toptyń partııa qurýǵa qatysty qujattary qaralyp jatqanyn aıtty, dep habarlaıdy QazAqparat tilshisi.

«2019 jyldan beri 10 bastamashy top saıası partııalardy tirkeýge qujat berdi. Onyń úsheýi birinshi kezeńnen ótti. Olardan habarlandyrý qabyldanyp, oǵan rastaý berildi. Eki partııa jarty jyl buryn rastaý alǵanymen partııa qurý baǵytynda odan ary jumys júrgizgen joq. Soǵan oraı tirkeýge arnalǵan qujattaryn usynbady», - dep atap ótti Qanat Mýsın Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, qazirgi ýaqytta Ádilet mınıstrliginiń qaraýynda 4 partııanyń qujaty jatyr.

«Halyq derbestigi» partııasy ekinshi kezeńge ótti. Olar sezderin ótkizip, qazirgi ýaqytta zańǵa sáıkes partııa retinde quryltaıshylyq sezin ótkizedi. 20 myń kandıdatynyń tizimin usynýy qajet. Qazirgi ýaqytta zańǵa sáıkes tirkeý merzimi toqtatyldy jáne partııa múshelerin tekserý júrip jatyr. «El tiregi», «Namys» jáne «Báıterek» partııalary boıynsha birinshi kezeń deńgeıinde jumys júrgizilýde. ıAǵnı, partııa qurý nıeti týraly habarlama alynǵannan keıin zańǵa oraı tekserý jasalady. Muny birneshe ret aıttym. Keminde 1 myń adam bolýy tıis bastamashylyq top músheleriniń arasynda JSN-i durys emes nemese JSN-ni atyna, tegine ákesiniń atyna sáıkes kelmeıtin tulǵalar bar. Ókinishke oraı, qaza tapqan azamattar, sonymen qatar ózge partııanyń músheleri anyqtaldy. Zańǵa sáıkes, Qazaqstan azamattary bir ǵana partııaǵa múshe bola alady. Sol sebepti ol basqa partııanyń qurylýyna qatysa almaıdy. Bul adamdar partııa qurýǵa bastamashylar qatarynan shyǵarylady jáne bastamashy toptyń músheleriniń sany azaıyp, zańmen bekitilgen shektelimnen tómen túsip ketedi. Osy kemshilikterdiń bárin joıǵannan keıin bastamashy top qujattaryn qaıtadan ótkizip, munan arǵy kezeńderge ótýge úmitker bola alady», - dedi ol.


Seriktester jańalyqtary

Jańalyqtar

Úrdis

MURAǴAT