Adamzattyń ǵaryshty ıgerý dáýiri qazaq jerinen bastaldy
2022 jylǵy 16 mamyr 01:10

Adamzattyń ǵaryshty ıgerý dáýiri qazaq jerinen bastaldy

BAIQOŃYR. QazAqparat – Osydan 65 jyl buryn qazaq jerindegi polıgonnan ǵaryshty ıgerýge alǵashqy qadam jasalyp, R-7 raketasy ushyryldy, dep habarlaıdy QazAqparat tilshisi.

2022 jyldyń 4 qazanynda adamzat úshin ǵarysh dáýiriniń bastalý mereıtoıy atap ótiledi. Týra 65 jyl buryn – 1957 jyldyń 4 qazanynda Baıqońyr ǵarysh aılaǵynan (ol kezde kosmodrom KSRO Qorǵanys mınıstrliginiń №5 polıgony ataldy) R-7 raketasy orbıtaǵa Jerdiń álemdegi alǵashqy jasandy serigin shyǵardy.

Degenmen, ǵaryshty ıgerýge tuńǵysh qadam 1957 jyldyń 15 mamyrynda jasaldy. Ol kezde qazaq dalasyndaǵy áskerı polıgonnan alǵash ret R-7 raketasy ushyryldy. Qujat derekterinen málim, kosmodromnyń №1 alańynyń (qazir Gagarın ushyrý alańy) ushyrý kesheni óz mindetin shtattyq rejımde oryndady. Raketa sátti ushyryldy jáne batys traektorııasy boıynsha 100 sekýndqa jýyq ushty. Biraq zymyrannyń artqy bóliginde ot tutanyp, ol kosmodromnan 300 km jerge qulady. Osy alǵashqy ushyrylym qurlyqaralyq ballıstıkalyq raketany qurýǵa mańyzdy qadam boldy jáne bul kún ǵarysh keńistigin ıgerýge kirisý datasy sanalady.

Nebári 4 aıdan keıin – 1957 jyldyń 4 qazanynda R-7 raketasy sátti ushyrylyp, ol Jerdiń tuńǵysh jasandy serigin ǵaryshqa alyp shyqty. Osylaısha, adamzattyń ǵaryshtaǵy dáýiri resmı bastaldy.

30 jyldan keıin, 1987 jyldyń 15 mamyrynda taǵy bir tarıhı ushyrylym jasaldy. Baıqońyr ǵarysh aılaǵynan «Energııa» zymyran-tasyǵyshy ǵaryshqa attandy. Ol jermańy orbıtasyna, Aıǵa, Kún júıesindegi planetalarǵa, sondaı-aq basqarylatyn ushyrylymdar úshin joǵary salmaqty júkterdi jáne gabarıtterdi jetkizýge qoldanyldy.


Avtor:
Tilshi

Jańalyqtar

MURAǴAT