Abaı Sarqulov «Qazaqstannyń damý banki» basqarmasynyń tóraǵalyǵynan ketti
2022 jylǵy 25 qańtar 17:46

Abaı Sarqulov «Qazaqstannyń damý banki» basqarmasynyń tóraǵalyǵynan ketti

NUR-SULTAN. QazAqparat - Abaı Sarqulovtyń «Qazaqstannyń damý banki» basshysy retindegi ókilettigi merziminen buryn aıaqtaldy, dep habarlaıdy QazAqparat QDB baspasóz qyzmetine silteme jasaı otyryp.

«Jalǵyz aktsıonerdiń («Báıterek» UBH» AQ) 24 qańtardaǵy sheshimimen Abaı Sarqulovtyń «Qazaqstannyń Damý Banki» AQ Basqarma tóraǵasy jáne Dırektorlar keńesiniń múshesi retindegi ókilettigi merziminen buryn toqtatyldy» delingen habarlamada.

Eske sala keteıik, 11 qańtar kúni Memleket basshysy Qasym-Jomart Toqaev Parlament Májilisiniń otyrysynda atalǵan bank qyzmetin synǵa alǵan bolatyn. «Qazaqstan damý banki» jeke toptardyń jeke bankine aınalǵan», - dedi Prezıdent.

Abaı Sarqulov 1981 jyly 13 tamyzda Aqtóbe oblysynda dúnıege kelgen. Q. Jubanov atyndaǵy Aqtóbe memlekettik ýnıversıtetiniń túlegi. Mamandyǵy - bank isi. Banktegi qyzmetin 2007 jyly ınfraqurylymdyq jobalardy kredıtteý basqarmasynyń menedjerinen bastaǵan. «Damý» kásipkerlikti damytý qory» AQ atqarýshy organyn basqardy. 2019 jyly QDB Basqarmasynyń tóraǵasy retinde taǵaıyndalyp, bul laýazymda ol Bolat Jámishevtiń ornyna keldi.

25 qańtardan bastap Sandýǵash Kenjebaeva QDB basshysynyń mindetin atqarady, ol buǵan deıin Bank Basqarmasy tóraǵasynyń orynbasary bolǵan.

«Qazaqstannyń Damý Banki» AQ (QDB) - 2001 jyly qurylǵan Qazaqstan ekonomıkasynyń shıkizattyq emes jáne ınfraqurylymdyq sektorlaryn jańǵyrtý jáne damytý jónindegi ulttyq damý ınstıtýty.


Jańalyqtar

MURAǴAT