Abaı oblysynda naızaǵaıdan shyqqan órt 280 gektarǵa jaıyldy
2022 jylǵy 22 maýsym 10:40

Abaı oblysynda naızaǵaıdan shyqqan órt 280 gektarǵa jaıyldy

SEMEI. QazAqparat – Abaı oblysy Besqaraǵaı aýdanynda naızaǵaıdan shyqqan órt 280 gektarǵa jaıyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 21 maýsymda saǵat 18:45-te «Semeı ormany» memlekettik orman tabıǵı rezervaty Dolon fılıalynyń aýmaǵynda órt shyqty.

Jalyn sharpyǵan aýmaq shamamen 280 gektardy qurady. Onyń ishinde 150 gektar orman aımaǵy jáne 130 gektar aýyldyq okrýg jerleri.

«Ot eldi mekenderge, úılerge jetken joq. Aldyn ala málimet boıynsha órt naızaǵaıdan shyqqan. Tilsiz jaý 22 maýsymda tańǵy saǵat 4.30-da oqshaýlandy», - dep habarlady vedomstvo ókilderi.

Órtpen kúreske TJD tarapynan 8 tehnıka men 37 qyzmetker, orman sharýashylyǵynan 25 tehnıka men 60 adam jumyldyrylǵan.

Osyǵan deıin Abaı oblysyndaǵy ormanda órt shyqqanyn habarlaǵan edik.




Uqsas jańalyqtar
Seriktester jańalyqtary

Jańalyqtar

Úrdis

MURAǴAT