«7-20-25» jáne «Nurly jerdi» jańa baǵdarlama almastyrady

NUR-SULTAN. QazAqparat - Indýstrııa jáne ınfraqurylymdyq damý mınıstrligi qurylys naryǵynda qalyptasqan ahýalǵa baılanysty pikir bildirdi, dep habarlaıdy QazAqparat.

«Ulttyq banktiń málimetine súıener bolsaq, «7-20-25» jáne «Nurly jer» baǵdarlamalaryn júzege asyrý úshin 500 mlrd teńge qosymsha qarjy bar. Baǵdarlamalar qarastyrylǵan qarajat tolyq ıgerilgeninshe sozylady. Sonymen qatar qazirgi tańda jeńildetilgen ıpotekalyq baǵdarlamalardyń aıaqtalýyna jáne zeınetaqy jınaǵyn alýdyń qysqarýyna oraı balamaly shara retinde ıpotekalyq nesıelerdi sýbsıdııalaý tetigin engizý qarastyrylýda. Buǵan deıin júzege asyrylǵan «Nurly jer» baǵdarlamasyndaǵy sharalar «Qýatty óńirler – el damýynyń draıveri» ulttyq jobasyna qaıta engizilgen. Osyǵan oraı, jeńildetilgen nesıeleý baǵdarlamalary «Otbasy banki» arqyly odan ármen júzege asyrylatyn bolady», - delingen mınıstrlik habarlamasynda.