«7-20-25» baǵdarlamasynyń keleshegi ne bolady - Ulttyq bank túsindirdi
2022 jylǵy 15 naýryz 18:21

«7-20-25» baǵdarlamasynyń keleshegi ne bolady - Ulttyq bank túsindirdi

NUR-SULTAN. QazAqparat – Ulttyq bank «7-20-25» baǵdarlamasynyń keleshegi týraly túsinikteme berdi, dep habarlaıdy QazAqparat tilshisi.

«7-20-25» baǵdarlamasynyń naqty aıaqtalý merzimi joq. Bul baǵdarlama boıynsha ıpotekalyq qaryz berý 1 trıllıon teńge somasyndaǵy qarjylandyrýdyń ındıkatıvtik kólemine jetkenge deıin jalǵasady. Osyǵan baılanysty baǵdarlamany aıaqtaýdyń naqty merzimi týraly aıtý múmkin emes. Al 2022 jyly baǵdarlamany aıaqtaý múmkindigi týraly aqparat negizinen halyq tarapynan suranysty baǵalaýǵa jáne ótken jyldardaǵy qarajatty ıgerý qarqynyna negizdelgen. Igerilmegen qarajattyń qaldyǵy azamattardyń edáýir sanyn jeńildetilgen nesıe berýmen qamtýǵa múmkindik beredi», - delingen QazAqparat tilshisiniń resmı saýalyna joldanǵan jaýapta.

Ulttyq bank deregine sáıkes, 10 naýryzdaǵy jaǵdaı boıynsha, «7-20-25» baǵdarlamasy arqyly 1,26 trln teńgege 97 myńnan astam ótinim qabyldanǵan.

Onyń ishinde 488,5 mlrd teńgege 39 myńnan astam qaryz berilgen.

Qazir tańda baǵdarlama 9 ekinshi deńgeıdegi bank arqyly iske asyrylyp otyr.

Olar: «Bank RBK» AQ, «Eýrazııalyq Bank» AQ, «First Heartland Jusan Bank» AQ, «Fortebank» AQ, «Qazaqstan Halyq banki» AQ, «Bank TsentrKredıt» AQ, «Sberbank» AQ EU, «Altyn Bank» AQ, «Bank Frıdom Fınans Qazaqstan» AQ.

Ulttyq bank mamandary búginde «Baspana hıt» ıpotekalyq baǵdarlamasy aıaqtalǵanyn eske saldy.

Bul baǵdarlama boıynsha 609,7 mlrd teńgege 64,6 myń qaryz berilgen.


Seriktester jańalyqtary

Jańalyqtar

Úrdis

MURAǴAT