5 qańtarda eki adam Almaty oblysy ákimdigin basyp alý jóninde nusqaý berip otyrǵan
2022 jylǵy 25 sáýir 15:16

5 qańtarda eki adam Almaty oblysy ákimdigin basyp alý jóninde nusqaý berip otyrǵan

NUR-SULTAN. QazAqparat – 5 qańtarda Almaty oblysynda eki adam áleýmettik jeliler arqyly óńir ákimdigin basyp alý jóninde tolyq nusqaý berip otyrǵan. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Qańtar oqıǵasy uıymdastyrýshylary men qatysýshylaryn anyqtaý jáne olardy jaýapqa tartý úshin jumys jalǵasyp jatyr. 4 qańtarda Almaty oblysynda A. jáne buryn sotty bolǵan S. esimdi azamattar qıratý, múlikterdi joıý jáne bılik ókilderine qarsy kúsh qoldaný týraly aldyn ala sóz baılasqan. 5 qańtarda atalǵan adamdar áleýmettik jeliler arqyly Taldyqorǵan qalasyndaǵy shaǵyn aýdanda 400 adamdy jınap, osy jerde olarǵa oblys ákimdigin basyp alý úshin tolyq nusqaý bergen», - dedi E. Qılymjanov.

Onyń aıtýynsha, uıymdasqan top ortalyq alańǵa qaraı júrip, onda jol boıynda tastarmen jáne metall armatýramen qarýlanǵan.

«Agressıvti top qolda bar quraldardyń kómegimen polıtsııanyń qorshaýyn buzyp ótip, oblys ákimdiginiń ǵımaratyn órtedi. Onymen toqtamaı, atalǵan A. jáne S. esimdi adamdar topqa taǵy 500 adamdy qosyp alyp, odan ári barlyǵy Taldyqorǵan qalasy polıtsııa basqarmasynyń ǵımaratyn basyp alýǵa bardy. Olardyń qylmystyq áreketinen polıtsııa ǵımaratynyń 80 paıyzy qırady», - dedi Bas prokýratýranyń ókili.

Budan buryn habarlanǵandaı, Qańtar oqıǵasy boıynsha tergeý organdarynyń is júrgizýinde 5 041 qylmystyq is bar.


Seriktester jańalyqtary

Jańalyqtar

Úrdis

MURAǴAT