4,5 myńǵa jýyq astanalyq Pfizer vaktsınasymen egildi
2021 jylǵy 23 qarasha 18:17

4,5 myńǵa jýyq astanalyq Pfizer vaktsınasymen egildi

NUR-SULTAN. QazAqparat – Elordada 4,5 myńǵa jýyq qala turǵyny Pfizer vaktsınasymen (birinshi komponent) egildi, dep habarlaıdy QazAqparat qala ákimdiginiń resmı saıtyna silteme jasap.

Olardyń arasynda jasóspirimder (12-17 jas) kósh bastap tur – 2 877 bala ekpe alǵan. Negizinen, mamandar atap ótkendeı, balalar mektepterdiń medıtsınalyq pýnkterinde vaktsınatsııalanady.

«Ata-analar kóbinese pedagogterge mekteptiń medpýnktinde egilý nıetimen ózderi júginedi. Olar bul jerde balalar úshin tanys orta, al ata-analar muǵalimdermen, medqyzmetkerlermen tanys bolǵandyqtan olardyń da kóńili jaı. Biz ata-analar men balalardyń osyndaı bastamasyna tek qýanyshtymyz. Olarǵa qolaıly orta usynyp, áńgimelesemiz, olardyń jaǵdaıyn birge qadaǵalaımyz», - deıdi «Salaýatty Astana» emhanasynyń mektep-mektepke deıingi bólimshesiniń meńgerýshisi Sáýle Eńsebaeva.

Sondaı-aq, dárigerdiń aıtýynsha, vaktsınatsııadan keıin baqylaý aımaǵynda oqýshylarǵa qandaǵy qant deńgeıin ustap turý úshin shaı, táttiler usynylady.

«Balalarǵa eń aldymen nazar aýdaryp, qamqorlyq tanytý qajet. Olar esh alańdamas úshin biz barynsha qolaıly jaǵdaı jasaýǵa tyrysamyz. Meniń oıymsha, balaǵa da, ata - anaǵa da osylaı yńǵaıly», - dep qosty dáriger.

Oqýshylardyń ata-analary da bul pikirmen kelisedi jáne medıtsına qyzmetkerlerin qoldaıdy.

«Mektep balalarǵa qalaı qamqorlyq jasaıtynyn, vaktsınatsııa protsesine óte muqııat qaraıtynyn baıqaımyz. Bárimiz de azdap alańdaımyz, biraq balalardyń densaýlyǵyna uqypty qaraǵandaryn kórip, bizdiń de kóńilimiz tynyshtaldy. Olarmen birge egý kabınetine kiremiz, birge otyramyz jáne 30 mınýt kútemiz, eń bastysy - bári tynysh ótedi», - dep atap ótti joǵary synyp oqýshysynyń anasy Maıragúl Ajetova.

Búginde qala boıynsha 90 júkti áıel, 1 357 bala emizetin ana jáne 2 877 jasóspirim Pfizer vaktsınasyn aldy. Qala boıynsha birinshi komponentpen barlyǵy 466 myńnan astam adam vaktsınatsııalandy.


Uqsas jańalyqtar

Jańalyqtar

Úrdis

MURAǴAT