«376,7 mlrd teńge bólinedi»: Elimizdiń 15 iri qalasynda 20 zamanaýı aýrýhana salynady
2021 jylǵy 2 jeltoqsan 12:56

«376,7 mlrd teńge bólinedi»: Elimizdiń 15 iri qalasynda 20 zamanaýı aýrýhana salynady

NUR-SULTAN. QazAqparat – Aldaǵy 5 jylda elimizdiń 15 iri qalasynda 20 zamanaýı aýrýhana men 2 ǵylymı-ınnovatsııalyq ortalyq salý úshin 376,7 mlrd teńge bólinedi, dep habarlaıdy QazAqparat tilshisi.

Bul týraly QR Densaýlyq saqtaý mınıstrliginiń baspasóz qyzmeti QazAqparattyń «Deni saý ult» ulttyq jobasy týraly saýalyna bergen jaýabynda málim etti.

«Ulttyq joba aıasynda «Medıtsına salasyndaǵy ınvestıtsııalyq ahýaldy jaqsartý mindetine» 2021-2025 jyldary 900 mlrd 856 mln teńge bólý kózdelgen», - dep jazady vedomsvto ókilderi.

Bul qarajatty mynadaı jolmen ıgerý josparlanyp otyr:

1) Aýyldyq eldi mekenderde, onyń ishinde tirek jáne spýtnıktik aýyldarda 137 feldsherlik-akýsherlik, medıtsınalyq pýnktter men dárigerlik ambýlatorııalar ashýǵa – respýblıkalyq bıýdjetten 8 mlrd 233 mln teńge;

2) Aýdandyq aýrýhanalardy qazirgi zamanǵy kompıýterlik tomograftarmen, rentgen apparattarymen, sondaı-aq perzenthanalardy, reanımatsııa jáne qarqyndy terapııa bólimshelerin, Medıtsınalyq jáne feldsherlik-akýsherlik pýnktterdi, dárigerlik ambýlatorııalardy qajetti medıtsınalyq jabdyqtarmen jaraqtandyrýǵa – respýblıkalyq bıýdjetten 93 mlrd 621 mln teńge, jergilikti bıýdjetterden 85 mlrd 000 mln teńge;

3) Nur-Sultan, Almaty, Shymkent, Túrkistan, Petropavl, Qaraǵandy, Aqtóbe, Kókshetaý, Óskemen, Atyraý, Taraz, Qyzylorda, Aqtaý, Pavlodar, Qostanaı qalalarynda keminde 20 zamanaýı aýrýhana jáne 2 ǵylymı-ınnovatsııalyq ortalyq salý boıynsha ınvestıtsııalyq jobalardy iske asyrýǵa – respýblıkalyq bıýdjetten 376 mlrd 695 mln teńge, bıýdjetten tys qarajat esebinen 76 mlrd 251 mln teńge;

4) Óńirlerde keminde 20 obekt salý jáne jańǵyrtý. Onyń ishinde «Ulttyq ǵylymı onkologııa ortalyǵy» JShS, «Akademık N.J.Batpenov atyndaǵy ulttyq ǵylymı travmatologııa jáne ortopedııa ortalyǵy» ShJQ RMK, «Jiti baqylanatyn mamandandyrylǵan úlgidegi respýblıkalyq psıhıatrııalyq aýrýhana» MM, «Otan soǵysynyń múgedekterine arnalǵan respýblıkalyq klınıkalyq gospıtal» ShJQ RMK sııaqty respýblıkalyq vedomstvolyq baǵynystaǵy uıymdardyń ınfraqurylymyn odan ári damytýǵa – repsýblıkalyq bıýdjetten 261 mlrd 56 mln teńge qarastyrylǵan.


Uqsas jańalyqtar

Jańalyqtar

Úrdis

MURAǴAT