31 úı órtenip, 2 adam qaza boldy – ShQO-da aıypty er adamǵa úkim shyqty
2022 jylǵy 25 mamyr 18:03

31 úı órtenip, 2 adam qaza boldy – ShQO-da aıypty er adamǵa úkim shyqty

ÓSKEMEN. QazAqparat – Shyǵys Qazaqstan oblysy Rıdder qalasynda 30-dan astam turǵyn úı men 276,4 gektar jerdiń órtenýine kináli er adam bas bostandyǵynan aıyrylyp, odan 125 mln teńge shyǵyn óndirildi, dep habarlaıdy QazAqparat tilshisi.

Buǵan deıin habarlaǵanymyzdaı, 2021 jyldyń 10 mamyrynda Rıdder qalasynda iri orman órti shyqty . Sonyń saldarynan 276,4 gektar orman, 31 turǵyn úı, 6 avtokólik otqa oranyp, qalada tótenshe jaǵdaı jarııalandy.

Tilsiz jaýdy aýyzdyqtaýǵa barlyǵy 86 tehnıka, 2 tikushaq jáne 528 adam jumyldyrylǵan. 12 mamyrda saǵat 14.30-da sóndirilgen qyzyl jalyn memleketke 252 mıllıon teńgeden astam materıaldyq zalal keltirdi. Órttiń shyǵýyna – otty abaısyz qoldaný sebep bolǵan.

«Búgin Rıdder qalalyq soty atalǵan faktige qatysty QR Qylmystyq kodeksiniń 104-baby 2-bóligi, 204-baby 2-bóligine sáıkes 36 jastaǵy aıyptalýshyǵa qatysty úkim shyǵardy. Іs materıaldarynda jazylǵandaı, ol otbasymen demalysqa shyqqanda ot jaqqan. Kenet jan jaqqa jaıylyp ketken jalyndy óz kúshimen sóndire almaı, sol jerden qashyp ketti. Bul alapat órt shyǵyp, 2 adamnyń kóz jumýyna ákelip soqty», - delingen ShQO soty baspasóz qyzmetiniń málimetinde.

Sot sheshimimen sottalýshy 2 jyl 6 aıǵa bas bostandyǵynan aıyryldy. Sondaı-aq 15 talap aryz qaralyp, nátıjesinde aıyptalýshydan 125 378 367 teńge shyǵyn óndirildi. Úkim zańdy kúshine engen joq.




Jańalyqtar

MURAǴAT