30 maýsym. Týǵan kún ıeleri
2022 jylǵy 30 maýsym 08:10

30 maýsym. Týǵan kún ıeleri

NUR-SULTAN. QazAqparat - QazAqparat seısenbi, 30 maýsymǵa arnalǵan «Týǵan kún ıeleri» kúntizbesin usynady.

ESІMDER

73 jyl buryn (1949) aqyn, jýrnalıst Qazaqstan Jazýshylar odaǵynyń múshesi, Qazaqstannyń eńbek sińirgen qyzmetkeri Hanbıbi ESENQARAQYZY dúnıege keldi.

Ońtústik Qazaqstan oblysynyń Saryaǵash aýdanynda týǵan. Eńbek jolyn ustazdyqtan bastaǵan. 1971-1976 jyldary - Saryaǵash aýdandyq «Qyzyl Tý» gazetiniń qyzmetkeri. 1976-1980 jyldary - oblystyq teleradıokomıtet redaktory. 1980-1987 jyldary - oblystyq halyq shyǵarmashylyǵy ortalyǵynyń bas mamany. 1987-2007 jyldary - oblystyq «Qaıyrymdylyq» qorynyń tóraıymy, oblystyq «Qazaq tili» qoǵamynyń tóraıymy, oblystyq mádenıet basqarmasynyń bastyǵy, Sh. Qaldaıaqov atyndaǵy oblystyq fılarmonııanyń dırektory qyzmetterin atqarǵan. Shymkenttegi saıası qýǵyn-súrgin qurbandary murajaıynyń dırektory.

«Qanat qaqty», «Bultsyz aspan», «Juldyzym», «Jangúlim», «Jan aıqaıy», «Mahabbat máńgilik», «Jyr kitaby», «Syr kitaby», «Shyndyqqa qaraı júzdim» atty prozalyq kitaptardyń avtory. «Parasat» ordenimen jáne «Qazaqstan Respýblıkasy Táýelsizdiginiń 10 jyldyǵy» merekelik medalimen marapattalǵan.

68 jyl buryn (1954) kınorejısser, Qazaqstannyń eńbek sińirgen óner qaıratkeri Sergeı Jumabaıuly ÁZІMOV dúnıege keldi.

Ózbekstan Respýblıkasynda týǵan. Búkilodaqtyq kınematografııa ınstıtýtyn bitirgen. «Qazaqfılm» kınostýdııasynyń kınorejısseri, Qazaqstan Kınematografııashylar odaǵynyń hatshysy, Qazaqstan Respýblıkasy Prezıdenti baspasóz qyzmetiniń sektor meńgerýshisi qyzmetterin atqarǵan. 1997-2001 jyldary - Qazaqstan Respýblıkasy Prezıdenti Teleradıokesheni bas dırektorynyń orynbasary, Almaty teleortalyǵynyń dırektory. 2001-2002 jyldary - «Habar» agenttiginiń bas prodıýseri. 2002-2007 jyldary Sh. Aımanov atyndaǵy «Qazaqfılm» ulttyq kompanııasynyń bas dırektory.

«Sheńber», «Uldar», «Men Abaıdy áke deımin», «Qııanat», «Astana - jańa el ordasy», «Múmkin emes eshteńe joq», «Beıtanys Nazarbaev», t.b. tolyq jáne qysqametrajdy derekti fılmderdi qoıyp, keıbiriniń stsenarııin jazdy.

65 jyl buryn (1957) «Ulttyq ǵaryshtyq zertteýler men tehnologııalar ortalyǵy» Basqarma Tóraǵasy Marat Rahmalyuly NURǴOJIN dúnıege keldi.

Tehnıka ǵylymdarynyń doktory, professor. 250 ǵylymı maqala, jeti patent, tórt monografııa, toǵyz oqýlyq pen ǵylymı ádistemelerdiń avtory, ol bes kandıdat pen bir ǵylym doktoryn, qyryqtan astam magıstrant daıyndap shyǵarǵan. 2013-2016 jyldary «Qazaqstan Ǵarysh Sapary» UK AQ prezıdentiniń mindetin atqarýshy, 2016 jyly tamyz-jeltoqsanda - «Qazaqstan Ǵarysh Sapary» UK AQ prezıdenti, QR qorǵanys jáne aeroǵarysh ónerkásibi vıtse-mınıstri (2016-2019), QR tsıfrlyq damý, qorǵanys jáne aeroǵarysh ónerkásibi vıtse-mınıstri (2019 jylǵy sáýir-jeltoqsan aralyǵynda). Qazirgi qyzmetinde – 2020 jyldyń qańtar aıynan bastap.

2013 jyly «Álemdik ǵylymǵa qosqan úlesi úshin» dańq ordenimen jáne oǵan qosa «Ǵylymdaǵy esim» qurmetti ataǵymen marapattalǵan. Memlekettik, úkimettik jáne ózge de marapattary: «Qurmet» ordeni, «Qazaqstan Táýelsizdigine 20 jyl», «QR Konstıtýtsııasyna 10 jyl», «QR Parlamentine 10 jyl» medaldary, «QR bilim berý isiniń Qurmetti qyzmetkeri», «Qazaqstan Respýblıkasy ǵylymyn damytýǵa qosqan jetistikteri úshin» belgileri, QR BǴM Qurmet gramotasy; QR Tuńǵysh Prezıdenti N.Á. Nazarbaevtyń Alǵys haty.

54 jyl buryn (1968) Premer-Mınıstrdiń orynbasary – QR Syrtqy ister mınıstri Muhtar Beskenuly TІLEÝBERDІ dúnıege keldi.

Ońtústik Qazaqstan oblysynda dúnıege kelgen. Qazaq memlekettik ýnıversıtetin bitirgen. 2-synypty Tótenshe jáne Ókiletti Elshi. Eńbek joly: 1993-1996 jyldary - Qazaqstan Respýblıkasy Syrtqy ister mınıstrligi Azııa elderi basqarmasynyń attashesi, úshinshi hatshysy. 1996-1999 jyldary - Qazaqstan Respýblıkasy Koreıadaǵy Elshiliginiń úshinshi, ekinshi hatshysy. 1999-2000 jyldary - Qazaqstan Respýblıkasy Syrtqy ister mınıstrligi Azııa, Taıaý Shyǵys jáne Afrıka elderi departamentiniń birinshi hatshysy, Ekijaqty yntymaqtastyq departamentiniń bólim bastyǵy. 2001-2003 jyldary - Qazaqstan Respýblıkasy Izraıldegi Elshiliginiń keńesshisi, QR isteriniń Izraıldegi Ýaqytsha senimdi ókili. 2003-2004 jyldary - Qazaqstan Respýblıkasy Syrtqy ister vıtse-mınıstri. 2004 jyldan bastap QR Malaızııadaǵy Tótenshe jáne Ókiletti Elshisi, 2005 jyldan bastap Qazaqstannyń Indonezııadaǵy, Brýneı Darýssalamdaǵy jáne Fılıppın Respýblıkasyndaǵy Tótenshe jáne ókiletti elshisi qyzmetin qosa atqardy. 2009 jyldan bastap QR Jenevadaǵy BUU bólimshesindegi jáne basqa da halyqaralyq uıymdardaǵy turaqty ókili, Qazaqstannyń Shveıtsarııadaǵy Tótenshe jáne Ókiletti elshisi, elimizdiń Lıhtenshteın knıazdigindegi jáne Vatıkan memleketindegi dıpmıssııasynyń basshysy mindetin qosa atqarýshy. 2016-2019 jyldary QR Syrtqy ister mınıstriniń birinshi orynbasary. Qazirgi qyzmetinde 2021 jylǵy qańtar aıynan beri.

51 jyl buryn (1971) Qazaqstan Respýblıkasynyń Izraıldegi elshiliginiń keńesshi-elshisi Rýslan Eskendiruly BÓLTІRІKOV dúnıege keldi.

Almaty qalasynda týǵan. Qazaq memlekettik ýnıversıtetin bitirgen. Abaı, tarıh jáne quqyq pániniń muǵalimi (1993), Qazaqstan Respýblıkasy Syrtqy ister mınıstrliginiń Dıplomatııalyq akademııasy, halyqaralyq qatynastar salasyndaǵy maman (2001).

Eńbek qyzmeti: Qazaqstan Respýblıkasy Syrtqy ister mınıstrligi TMD elderi bóliminiń referenti (1993-1994), Qazaqstan Respýblıkasy Syrtqy ister mınıstrligi TMD elderi departamentiniń attashesi (02.1994-06.1994), Qazaqstan Respýblıkasy Syrtqy ister mınıstrligi Eýropa elderiniń attashesi (1994-1995), Qazaqstan Respýblıkasy Syrtqy ister mınıstri Hatshylyǵynyń úshinshi hatshysy (Mınıstrdiń kómekshisi) (05.1995-11.1995), Qazaqstan Respýblıkasy Koreıa Respýblıkasyndaǵy Elshiliginiń úshinshi hatshysy (1995-1997), Qazaqstan Respýblıkasy Koreıa Respýblıkasyndaǵy Elshiliginiń ekinshi hatshysy (1997-1999), Ekijaqty yntymaqtastyq departamenti Amerıka sektsııasynyń birinshi hatshysy (2001-2002), «QazTransGaz» JAQ bas dırektorynyń kómekshisi (01.2002-09.2002), «QazTransGaz» JAQ ekonomıkalyq taldaý bóliminiń bas menedjeri (09.2002-10.2002), «QazTransOıl» JAQ ákimshilik bóliminiń meńgerýshisi (2002-2003), «QazMunaıGaz» UK JAQ Uıymdastyrý jáne qujattamalyq qamtamasyz etý departamenti dırektorynyń orynbasary (05.2003-11.2003), «QazMunaıGaz» UK JAQ keńsesiniń syrtqy baılanystar sektorynyń bas menedjeri (11.2003-12.2003), Batys Qazaqstan oblysy ákimi apparaty basshysynyń orynbasary (2004-2007), Batys Qazaqstan oblysy ákimi apparatynyń basshysy (02.2007-09.2007), Ońtústik Qazaqstan oblysy ákimi apparaty basshysynyń orynbasary (2007-2009), Qazaqstan Respýblıkasy Qorshaǵan ortany qorǵaý mınıstrliginiń uıymdastyrý-kadr jumysy jáne qujat aınalymy dırektorynyń orynbasary, Qorshaǵan ortany qorǵaý mınıstrligi Ekologııalyq retteý jáne baqylaý komıteti tóraǵasynyń orynbasary (2009-2011), Qazaqstan Respýblıkasy Qorshaǵan ortany qorǵaý vıtse-mınıstri (2011-2012), Qazaqstan Respýblıkasy Syrtqy ister mınıstrligi Almaty qalasyndaǵy ókildiginiń basshysy (2012 jyldan).

46 jyl buryn (1976) Qazaqstan Respýblıkasynyń Aqparat jáne qoǵamdyq damý mınıstri Asqar Qýanyshuly ÝMAROV dúnıege kelgen.

Almaty qalasynda týǵan. «Turan» ýnıversıtetinde halyqaralyq ekonomıkalyq qatynastar mamandyǵy boıynsha bilim alǵan. Izraıl men Polshada stajırovkadan ótken. Eńbek joly: Mádenıet máseleleri jónindegi respýblıkalyq ortalyqtyń ekonomıka jónindegi mamany (1997), «BIKO» baspa úıiniń marketıng jónindegi mamany (1998-1999), 2001-2004 jyldary - «Novostı Nedelı» JShS, tilshi, saıasat bóliminiń meńgerýshisi, 2004-2006 jyldary - «Qazaqstan» RTRK» AQ Aqparattyq-saraptamalyq baǵdarlamalar dırektsııasynyń shef-redaktory, dırektordyń orynbasary, «QazMunaıGaz» UK» AQ-nyń bas menedjeri, «Infinity Communication» JShS kreatıv dırektory qyzmetterin atqarǵan. Sondaı-aq, 2008-2010 jyldary - «Nur Medıa» JShS bas dırektorynyń birinshi orynbasary, 2011-2013 jyldary - «Túrki akademııasy» kommertsııalyq emes aktsıonerlik qoǵamynyń vıtse-prezıdenti, 2014 jyldyń shilde aıynan qyrkúıekke deıin - «Astana EKSPO-2017» Ulttyq kompanııasy» AQ-nyń basqarýshy dırektory, 2014-2017 jyldary - «QazBıznesMedıa» QQ-nyń prezıdenti laýazymdarynda qyzmet etken. 2017-2020 jyldary - «QazAqparat» halyqaralyq aqparat agenttigi» JShS bas dırektory qyzmetin atqardy. 2020-2021 jyldary «QazAqparat» halyqaralyq aqparat agenttigi» AQ basqarma tóraǵasy; 2021-2022 jyldary Qazaqstan Respýblıkasy Aqparat jáne qoǵamdyq damý vıtse-mınıstri qyzmetin atqardy.

2022 jyldyń qańtar aıynan bastap qazirgi qyzmetinde.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT