30 qarasha kúngi aýa raıy boljamy
NUR-SULTAN. QazAqparat – 30 qarashada aýqymdy antıtsıklon jotasy áli de respýblıkanyń basym bóligindegi aýa raıyn anyqtaıdy. Soǵan oraı jaýyn-shashynsyz kún raıy kútiledi. Respýblıkanyń tek batysynda eýropalyq tsıklon jyrasy áserinen jaýyn-shashyn (jańbyr men qar túrinde), kóktaıǵaq, tuman, ekpindi jel boljanady, dep habarlaıdy QazAqparat Qazgıdrometke silteme jasap.
Batys Qazaqstan oblysynyń soltústik jartysynda tuman, kóktaıǵaq, 15-20 m/s ekpinde jel bolady.
Atyraý oblysynyń soltústiginde tuman, batysy men shyǵysynda 15-20 m/s jyldamdyqta jel turady.
Mańǵystaý oblysynyń batysy men ortalyǵynda jel kúsheıedi - 15-20 m/s, kúndiz shańdy daýyl bolady.
Qostanaı oblysynyń ońtústiginde, Soltústik-Qazaqstan oblysynyń batysynda, Qyzylorda oblysynyń soltústiginde, Jambyl oblysynyń taýly jáne taý bókterindegi aýdandarynda tuman kútiledi. Qostanaı oblysynyń batysynda jel kúsheıedi, ekpini - 15-20 m/s.
Almaty oblysynyń Alakól aýdanynda jeldiń ekpini 28 m/s kúsheıedi.
