3 myńnan astam kásiporyn eńbekti qorǵaýdyń halyqaralyq standartyn engizdi - Toǵjanov
2022 jylǵy 26 mamyr 17:04

3 myńnan astam kásiporyn eńbekti qorǵaýdyń halyqaralyq standartyn engizdi - Toǵjanov

NUR-SULTAN. QazAqparat – Elimizde 3 myńnan astam kásiporyn eńbekti qorǵaýdyń halyqaralyq standartyn engizdi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Halyqaralyq eńbek uıymynyń Ónerkásip pen saýdadaǵy, sonymen qatar aýyl sharýashylyǵyndaǵy eńbek ınspektsııasy týraly konventsııasyn eskere otyryp, memlekettik eńbek ınspektsııasynyń áleýetin kúsheıtý, atqarýshy organdar men Eńbek jáne halyqty áleýmettik qorǵaý mınıstrligi arasyndaǵy baqylaý qyzmetin bólý boıynsha is-sharalar qabyldanyp jatyr», - dedi Úkimet basshysynyń orynbasary elordada ótip jatqan KIOSH-2022 X Qazaqstandyq eńbekti qorǵaý jáne ónerkásiptik qaýipsizdik jónindegi halyqaralyq konferentsııa barysynda.

Onyń atap ótýinshe, eńbek qaýipsizdigin qamtamasyz etý jónindegi zamanaýı ári barynsha tıimdi ádisterge jiti nazar aýdarylady. Sonymen qatar memlekettik eńbek ınspektorlarynyń bilimin únemi jetildirý qolǵa alynady.

«Shamamen 300 kásiporyn nóldik jaraqattaný konventsııasyna qosylsa, 3 myńnan astam kásiporyn qaýipsizdik jáne eńbekti qorǵaý halyqaralyq standarttaryn engizdi. El kásiporyndarynda azamattardyń eńbek quqyǵynyń buzylýyna jol bermeýge baqylaý turaqty túrde júrgiziledi. Ótken jyly quqyq qorǵaý organdaryna eńbek quqyǵynyń buzylý faktisi boıynsha 1 myńnan astam is jiberilip, usynylǵan derekterdiń negizinde 127 qylmystyq is qozǵaldy», - dedi Eraly Toǵjanov.


Seriktester jańalyqtary

Jańalyqtar

Úrdis

MURAǴAT