الاكولدە 3 مىڭ شارشى مەتر دەمالىس ورنى ورتەنىپ، 7 ادام زارداپ شەكتى
5 شىلدە 07:27

الاكولدە 3 مىڭ شارشى مەتر دەمالىس ورنى ورتەنىپ، 7 ادام زارداپ شەكتى

اباي وبلىسى. قازاقپارات - اباي وبلىسى ءۇرجار اۋدانىندا الاكول جاعاسىنداعى دەمالىس بازاسىندا بولعان ءورت 5 ساعات بويى ءسوندىرىلدى، دەپ حابارلايدى قازاقپارات.

«الاكول جاعاسىنداعى دەمالىس بازاسىندا الدىن الا ەسەپتەلگەندەي 3 مىڭ شارشى مەتر اۋماق ورتەنگەن. 4 دەمالىس ورنى ءبۇلىندى. ءبىر- بىرىنە جالعاپ سالىنعان اعاش ۇيلەرگە ءورت جىلدام تارادى. ونىڭ ۇستىنە قاتتى جەل دە ءورتتى سوندىرۋگە كەدەرگى كەلتىرگەن. 5 ساعات 40 مينۋتقا سوزىلعان الاپات ءورتتى سوندىرۋگە توتەنشە جاعدايلار دەپارتامەنتى جانە پوليتسيا، جەرگىلىكتى ورگانداردان كەلگەن 186 ادام مەن 29 تەحنيكا جۇمىلدىرىلدى. ورتتەن زارداپ شەككەن 7 ادام مەديتسينالىق كومەككە جۇگىنگەن. الايدا ولار اۋرۋحاناعا جاتۋدان باس تارتقان»، - دەلىنگەن اباي وبلىسىنىڭ ت ج د باسپا ءسوز قىزمەتى حابارلاماسىندا.

ءورتتىڭ نەدەن شىققانى انىقتالۋدا. وقيعا ورنىندا وپەراتيۆتىك شتاب جۇمىس ىستەپ جاتىر. ايتا كەتسەك، 4 - شىلدە كۇنى ساعات 23:20-دا ءۇرجار اۋدانىنداعى الاكول جاعاسىنداعى دەمالىس بازاسىندا ءورت شىققان. قاتتى جەلدىڭ كەسىرىنەن قىزىل جالىن قاس پەن كوزدىڭ اراسىندا كورشى بازانى شارپىپ ۇلگەرگەن. الەۋمەتتىك جەلىدە الاكولدەگى ءورت تۇسىرىلگەن ۆيدەولار جاريالانىپ جاتىر. جەلى قولدانۋشىلارى دەمالىس ورنىنداعى ادامداردىڭ قاۋىپسىز جەرگە شىققانىن، كەيبىرى ءورتتى سوندىرۋگە اتسالىسىپ جاتقانىن ايتادى.


جاڭالىقتار