27 myńnan astam qazaqstandyq EAEO aýmaǵyndaǵy bos jumys oryndaryna qyzyǵýshylyq tanytty
NUR-SULTAN. QazAqparat - 242 myńnan astam adam bıyldyń 1 shildesinde iske qosylǵan Eýrazııalyq ekonomıkalyq odaqqa múshe elderdegi bos jumys oryndaryn izdeýdiń «Shekarasyz jumys» portalyna kirdi, olardyń 27,7 myńy qazaqstandyqtar, dep habarlaıdy QazAqparat tilshisi.
«Búgingi tańda servıstiń belsendi paıdalanýshylarynyń (qyzmetkerler men jumys berýshilerdiń) sany 59,2 myń, onyń ishinde 2,8 myń qazaqstandyq bar. Statıstıkaǵa sáıkes, Qazaqstan azamattary Belarýs Respýblıkasyndaǵy bos oryndarǵa 23 jaýap jáne Reseı Federatsııasyndaǵy bos oryndarǵa 362 jaýap jibergen. Óz kezeginde, qazaqstandyq jumys berýshiler reseılikterden 53 pikir jáne belorýstardan 2 pikir alǵan. Sonymen qatar, Qazaqstan Respýblıkasynyń jumys izdeýshi azamattary Reseı Federatsııasynan áńgimelesýge 643 shaqyrý aldy», - delingen QR Eńbek jáne halyqty áleýmettik qorǵaý mınıstrligi málimetinde.
Esterińizge sala keteıik, «Shekarasyz jumys» portaly 2021 jyldyń 1 shildesinen bastap jumys isteıdi. Bul Eýrazııalyq ekonomıkalyq odaqqa múshe memleketterdiń jumysqa ornalastyrý jáne jumyspen qamtý salasyndaǵy aqparattyq júıelerinde qamtylǵan bos jumys oryndary men bos jumys oryndaryn izdeýshiler týraly aqparatqa qol jetkizýge arnalǵan birizdendirilgen izdeý júıesi.
Jobada bes eldiń (Armenııa, Qazaqstan, Belarýs, Qyrǵyzstan, Reseı) jumys izdeýdiń qoldanystaǵy ulttyq júıeleri iske qosylǵan. Jobany iske asyrý aıasynda júıe paıdalanýshylaryna aýmaqtarynda jumys izdeýdi nemese personaldy irikteýdi júzege asyrý, ulttyq aqparattyq júıelerge ámbebap izdestirý suratýyn qalyptastyrý, bos jumys oryndary men túıindemeler boıynsha aqparatqa qol jetkizý, sondaı-aq jaýap jiberý nemese áńgimelesýge shaqyrý múmkindigi talap etiletin bir nemese birneshe múshe memleketti tańdaý múmkindigi berilgen.
Bul tsıfrlyq júıe EAEO-ǵa múshe memleketterdiń azamattaryna jumys izdeý jáne jumysqa ornalasý úshin (óz eliniń aýmaǵynda da, EAEO-ǵa múshe ózge memleketterde de), al jumys berýshilerge personal izdeý úshin jańa múmkindikter berdi.
