+7 (701) 759 90 19
USD 425.78 EUR 494.08
RUB 5.98 CNY 66.23
Jańalyqtar

2050 jylǵa qaraı Qazaqstan halqy 25 mln adamǵa deıin ósýi boljandy

2021 jylǵy 10 tamyz 10:01
Bólisińiz:
2050 jylǵa qaraı Qazaqstan halqy 25 mln adamǵa deıin ósýi boljandy

NUR-SULTAN. QazAqparat - Qazaqstanda 2050 jylǵa qaraı jumys kúshiniń sany shamamen 11,4 mln adamdy quraıdy. Bul týraly QazAqparat Eńbek mınıstrligine silteme jasap habarlaıdy.

QR Eńbek jáne halyqty áleýmettik qorǵaý mınıstrliginiń tapsyrysy aıasynda «Eńbek resýrstaryn damytý ortalyǵy» AQ Qazaqstan boıynsha 2050 jylǵa deıin uzaqmerzimdi demografııalyq boljam daıyndady. Statıstıkalyq derekter men modeldeý negizinde sarapshylar 2030 jylǵa qaraı jumys kúshiniń sany 9,7 mln adamǵa jetip, 2040 jyly bul kórsetkish 10,7 mıllıondy quraıdy, al 2050 jylǵa qaraı 11,4 mıllıonǵa deıin ósedi dep esepteıdi.

Bul rette, boljamdyq negizgi stsenarıı boıynsha 2030 jylǵa qaraı el halqy shamamen 20,7 mln adamdy quraıdy, 2040 jylǵa qaraı atalǵan kórsetkish 22,9 mln adamǵa deıin jetip, al 2050 jylǵa qaraı 25,5 mln adamǵa deıin ósedi dep kútilýde.

«Boljamǵa sáıkes 2030 jylǵa qaraı týýdyń joǵary deńgeıi men halyqtyń qartaıýyna baılanysty jumys kúshiniń halyqqa paıyzdyq qatynasy 46,7%-ǵa deıin tómendeıdi. Bul ekonomıkalyq belsendi halyqqa júkteme ósetinin bildiredi», – dedi ERDO Boljamdaý departamentiniń dırektory Dmıtrıı Shýmekov.

Sondaı-aq, óz boljamynda ERDO sarapshylary 2050 jylǵa qaraı halyq sanynyń óńirlik sáıkessizdiginiń kúsheıetinin atap ótti. Turǵyndar sanynyń eń kóp ósýi respýblıkalyq mańyzy bar qalalarda kútiledi: Nur-Sultan – 2,7 ese (1,9 mıllıon), Almaty – 1,8 ese (1,6 mıllıon) jáne Shymkent – 2,4 ese (1,5 mılllıon).

Budan basqa, Mańǵystaý oblysynyń halqy eki esege (1,4 mln adamǵa deıin), Túrkistan oblysynda 500 myńǵa (2,5 mıllıonǵa deıin), al Almaty oblysynda 700 myńǵa (2,8 mıllıonǵa deıin) kóbeıýi yqtımal.

Aǵymdaǵy týý, ólim-jitim jáne kóshi-qon koeffıtsıentteri turǵysynda Shyǵys Qazaqstan, Qaraǵandy, Qostanaı, Soltústik Qazaqstan, Pavlodar jáne Aqmola oblystarynda halyq sanynyń birtindep tómendeýi baıqalatyn bolady. Alaıda, mysaly, eger jalpy týý koeffıtsıenti kórsetilgen aımaqtarda ýaqyt óte kele aıtarlyqtaı ósip, turǵyndardyń qonys aýdarýy tómendese (etnıkalyq qurylymynyń ózgerýine jáne naqty kirisiniń artýyna baılanysty), onda osy aımaqtardaǵy halyq sany turaqtanýy múmkin.

Jalpy, 2050 jylǵa deıingi uzaqmerzimdi demografııalyq boljam mynadaı baǵyttar boıynsha jasaldy: halyqtyń jalpy sany, halyqtyń jas quramy, 2050 jylǵa qaraı stsenarııler boıynsha jas quramyndaǵy aıyrmashylyqtar, óńirlik sáıkessizdikter, óńirler boıynsha halyq sany, demografııalyq qarqyn, jumys kúshiniń sany, jumys kúshiniń qurylymy men ortasha jasy, onyń óńirlik sáıkessizdikteri, óńirler boıynsha bólý jáne taǵy basqa.

Sonymen birge, odan ári 2021 jylǵy demografııalyq kórsetkishterdiń naqty ózgeristeri negizinde (halyq sanaǵyn eskere otyryp) osy boljamǵa túzetý jasaý josparlanýda.

«Boljam tórt quramdas bóliktiń negizinde qurylady: halyqtyń bastapqy naqty sany, týý, ólim-jitim jáne halyqtyń kóshi-qon qozǵalysy. Bul 2022 jyldyń ózinde jańa statıstıkalyq derekter búgingi tańda ózekti bolyp otyrǵan baǵalaýlardan aıtarlyqtaı erekshelenetin jaǵdaı bolýy múmkin degendi bildiredi. Tıisinshe bul demografııalyq boljamdy jańartý qajettiligine ákelýi múmkin», - dep túıindedi Dmıtrıı Shýmekov.
Bizdiń kanalymyzǵa jazylyńyz:

Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059

MURAǴAT