2025 jylǵa deıin respýblıkalyq joldar 100 paıyz jóndeledi – mınıstrlik
NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev elimizdegi avtomobıl joldarynyń jaı-kúıin baıandady, dep habarlaıdy QazAqparat tilshisi.
Mınıstrdiń aıtýynsha, elimizdegi avtomobıl joldarynyń jalpy uzyndyǵy 96 myń shaqyrymdy quraıdy. Onyń ishinde 25 myń shaqyrymy – respýblıkalyq mańyzy bar joldar bolsa, qalǵan 71 myńy – oblystyq jáne aýdandyq mańyzy bar joldar.
«2025 jylǵa deıin respýblıkalyq mańyzy bar joldardyń normatıvtik jaǵdaıdaǵy úlesin 100 paıyzǵa, jergilikti jeli joldarynyń úlesin 95 paıyzǵa deıin jetkizý kózdelip otyr», - dedi Q. Óskenbaev Úkimet otyrysynda.
Kólik-tranzıttik áleýetti arttyrý mindetterin iske asyrý 8 kólik dálizin jańǵyrtý arqyly qamtamasyz etiledi.
«Búginde jalpy barlyq dálizder tolyq qýatynda jumys istep tur. Jekelegen ýchaskeler boıynsha ótkizý qabiletin arttyrý úshin rekonstrýktsııalaý jumystary júrgizilip jatyr», - dedi Q. Óskenbaev.
