FÝTBOLDAN ÁLEM ChEMPIONATY-2022
  Jańalyqtar  >

2023 jyly Astanadaǵy balabaqshalarda qandaı jumystar atqarylady

2022 jylǵy 5 qazan, 18:09
2023 jyly Astanadaǵy balabaqshalarda qandaı jumystar atqarylady

ASTANA. QazAqparat – Astana qalasy Bilim basqarmasynyń basshysy Qasymhan Senǵazyev qaladaǵy balabaqshalardy jóndeýge jáne olardy jabdyqtarmen qamtamasyz etýge qajet qarajat somasyn aıtty, dep habarlaıdy QazAqparat tilshisi.

«Qalada 56 myńnan astam balany qamtıtyn 432 mektepke deıingi bilim berý uıymy jumys istep jatyr. Onyń 99-y memlekettik balabaqsha sanatynda. Balabaqshalardy qarjylandyrý jyl saıyn ósip keledi. Degenmen, sheshilmegen máseleler bar. Sońǵy eki jylda 35 balabaqshaǵa kúrdeli jóndeý júrgizildi. Oǵan 2 mlrd teńgeden asa qarajat bólindi. Sonymen qatar, qazirgi kezde 6 balabaqshanyń tehnıkalyq jaǵdaıyn jaqsartý úshin kúrdeli jóndeý jumystaryn atqarý kerek», - dedi Q. Senǵazyev qalalyq máslıhattaǵy turaqty komıssııanyń otyrysynda.

Onyń aıtýynsha, qazirgi ýaqytta bir balabaqshada jobalaý smeta qujattary saraptamadan ótip, oǵan oń nátıje berilgen. Bul baǵytta keler jyly 374 mln teńge kerek bolady.

«Taǵy bir balaqshanyń jobalaý smeta qujattamasy bar. Olardy saraptamaǵa jiberdik. Úsh balabaqshada tehnıkalyq tekerý qorytyndysy boıynsha kúrdeli jóndeý júrgizý úshin tıisti qujattardy daıarlaý qajet», - dedi basqarma basshysy.

Sonymen qatar ol 2023 jyly 10 balabaqshada josparly jóndeý jumystaryn júrgizýge 250 mln teńge surap otyrǵanyn aıtty.

«Balabaqshalardaǵy oıyn alańdarynyń tozyǵy jetip otyr. Sońǵy úsh jylda balabaqshalarǵa shaǵyn arhıtektýralyq formalar (Malye arhıtektýrnye formy) satyp alynbaǵan. Olardyń tehnıkalyq jaǵdaıy nasharlap ketken. Sondyqtan 73 balabaqshaǵa jalpy somasy 1 mlrd 825 mln teńgeni quraıtyn shaǵyn arhıtektýralyq formalardy aýystyrý kerek. Munymen qosa, balalar oınaıtyn jerlerde jaraqat alý oqıǵalary jıi kezdesedi. 67 balabaqshada ashana bloktaryn aýystyrý qajet. Osy oraıda 274 mln teńgege smeta jasap qoıdyq», - dedi Qasymhan Senǵazyev.

Onyń sózine qaraǵanda, keler jyly 96 balabaqshada oıynshyqpen jabdyqtaýǵa 184 mln teńge kerek bolady.


Tegı:
Astana   Qurylys   balabaqsha  
Uqsas jańalyqtar
Seriktester jańalyqtary

Jańalyqtar