20 qańtarda kún raıy qandaı bolady: «Qazgıdromet» boljamy

NUR-SULTAN. QazAqparat – «Qazgıdromet» RMK-sy 20 qańtardaǵy kún raıy boljamyn jarııalady, dep habarlaıdy QazAqparat.

Kásiporyn taratqan derekterge qaraǵanda, batys jáne ońtústik óńirlerde atmosferalyq frontaldy bólikterdiń ótýine oraı jaýyn-shashyn, respýblıkanyń ońtústiginde nóser jaýyn men qar jaýady. Tek soltústik-batys, soltústik oblystar antıtsıklonnyń yqpalynda bolady, soǵan baılanysty kún jaýyn-shashynsyz bolady. Respýblıkanyń keı jerlerinde jel kúsheıip, burqasyn, tuman, kóktaıǵaq bolady.

Jambyl oblysynyń soltústiginde, ońtústik-batysynda, taýly jáne taý bókterindegi aýdandarynda tuman túsip, kóktaıǵaq bolady, oblystyń ońtústik-batysynda, soltústik-shyǵysynda jáne taýly aımaqtarynda jeldiń jyldamdyǵy sekýndyna 15-20 metrge jetedi. Túnde jeldiń ekpini 23-28 metr bolady.

Túrkistan oblysynyń batysynda, soltústiginde, taýly aımaqtarynda tuman túsip, kóktaıǵaq bolady, oblystyń taý jáne taý bókterinde jeldiń jyldamdyǵy sekýndyna 15-20 metrge jetedi.

Almaty oblysynyń ońtústiginde, shyǵysynda tuman túsip, kóktaıǵaq bolady, oblystyń shyǵysynda jeldiń jyldamdyǵy sekýndyna 15-20 metrge jetedi.

Aqmola oblysynyń ońtústik jartysynda tuman túsedi.

Batys Qazaqstan oblysynyń batysynda, shyǵysynda, ońtústik-batysynda jaıaý burqasyn soǵyp, oblystyń batysynda, soltústiginde tuman túsedi.

Atyraý oblysynyń batysynda, ortalyǵynda tuman túsip, kóktaıǵaq bolady, oblystyń soltústiginde jaıaý burqasyn soǵyp, jeldiń jyldamdyǵy sekýndyna 15-20 metrge jetedi.

Mańǵystaý oblysynyń soltústik-batysynda tuman túsip, kóktaıǵaq bolady.

Aqtóbe oblysynyń shyǵysynda, Qostanaı oblysynyń soltústiginde, Soltústik Qazaqstan oblysynyń ońtústiginde, Pavlodar oblysynyń ońtústiginde, batysynda, shyǵysynda, Qyzylorda oblysynyń soltústiginde, ońtústiginde tuman túsýi yqtımal.

Qaraǵandy ​​oblysynyń ońtústik-shyǵysynda jaıaý burqasyn, oblystyń soltústiginde tuman túsedi.

Shyǵys Qazaqstan oblysynyń ońtústik-batysynda, shyǵysynda jaıaý burqasyn soǵyp, joldarda kóktaıǵaq, oblystyń soltústiginde tuman túsedi, túnde oblystyń ońtústik-batysynda jeldiń jyldamdyǵy 15-20 m/s-ke jetedi.