2 kg gashıshti satý kezinde ustalǵan Petropavl turǵyny sottaldy
2022 jylǵy 10 tamyz 00:04

2 kg gashıshti satý kezinde ustalǵan Petropavl turǵyny sottaldy

PETROPAVL. QazAqparat – Soltústik Qazaqstan oblysynda jyl basynan beri esirtki saýdasyna qatysty 46 derek tirkelse, 22 adam bas bostandyǵynan aıyryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavl qalasynyń 35 jastaǵy turǵyny 11,5 jylǵa sottaldy. Ótken jyldyń qyrkúıek aıynda jedel-izdestirý sharalarynyń nátıjesinde er adam 2 kelige jýyq gashıshti satý kezinde «Taıga» saýda ortalyǵynyń janynda ustaldy. Esirtkiniń bul túri úshin asa iri kólem 200 gramnan bastalady.

Ustalǵan adam buryn múliktik qylmys jasaǵany úshin birneshe ret jazaǵa tartylǵan. Biraq budan ózine eshqandaı qorytyndy jasamasa kerek. Er adam bas bostandyǵyn shekteý jazasyna tartylǵanyna qaramastan esirtki satýmen aınalysqan. Sot bul faktini eskerip, esirtki qylmysy úshin kózdelgen merzimge urlyq jasaǵany úshin ótelmegen jaza merziminiń bir bóligin qosty. Endi ol jazasyn qaýipsizdigi barynsha joǵary mekemede óteıdi.

«Esirtkini satý – asa aýyr qylmystar sanatyna jatady, zańnamada bul qylmystar úshin qatań jaza qarastyrylǵan. Jyl basynan beri SQO-da esirtkini satqany úshin 22 adam sottaldy. Jalpy esirtki satýdyń 46 faktisi tirkeldi, olardyń 27 – asa aýyr, ıaǵnı birneshe ret, toppen jasalǵan, asa iri kólemde, t.b.. Zańsyz aınalymnan jalpy 300 keliden astam esirtki tárkilendi.

SQO PD Esirtki qylmysyna qarsy is-qımyl basqarmasynda 8 (7152) 39-72-16 senim telefony jumys isteıtini týraly eske salamyz. Senim telefony arqyly esirtkiniń zańsyz aınalymyna qatysy bar faktilerdi habarlaýǵa bolady. Sondaı-aq, polıtsııaǵa Instagram, Facebook áleýmettik jelilerindegi akkaýntar jáne «102» arnasy arqyly habarlasýǵa bolady. Azamattyq qoǵamnyń belsendi túrde kómek kórsetýi – esirtki bıznesine qarsy kúrestiń negizgi sharttarynyń biri», - deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT