154 túrkistandyq úılerinen evakýatsııalandy: Óńirge mınıstr ushyp shyqpaq
TÚRKІSTAN. QazAqparat – Túrkistan oblysynda sý basqan aýdandardan 154 adam evakýatsııalandy. Saýran aýdanynda 4 evakýatsııalyq pýnkt daıyndaldy. QazAqparat bul týraly Tótenshe jaǵdaılar mınıstrliginiń baspasóz qyzmetine silteme jasap habarlaıdy.
Málim etilgendeı, Túrkistan oblysynda mınıstrliktiń respýblıkalyq jedel shtaby uıymdastyryldy. 300-den astam adam, 50-den astam tehnıka, 25 motopompa sýdy soryp shyǵarý jáne aǵyzý jumystaryna jumyldyryldy. Óńirge mınıstr ıÝrıı Ilın ushyp shyqpaq.
«Tótenshe jaǵdaılar departamentiniń kúshimen sý basqan aýla aýmaqtarynan 154 adam evakýatsııalandy. Evakýatsııalanǵan adamdar týystarynyń úılerine ketti.
Halyqty evakýatsııalaý jáne ýaqytsha ornalastyrý úshin Saýran aýdanynda 4 evakýatsııalyq pýnkt daıyndaldy.
Jergilikti atqarýshy organdardyń kúshterimen úılerdi sý basýǵa jol bermeý maqsatynda 2500 birlik kóleminde qum salynǵan qaptar tóseý jumystary júrgizilip jatyr.
Maıdantal aýylynda kanaldardy ótkizý arqyly sýdy burý jáne aǵyzý boıynsha júrgizilgen jumystardyń nátıjesinde aýla ýchaskelerin sý basý qaýpi seıildi.
Oblystyq mańyzy bar 11 avtomobıl jolynyń 23 ýchaskesin sý basyp qaldy.
Ordabasy aýdanyndaǵy «Naıman» jáne «Qurtaı» sýarý kanaldarynda sý deńgeıiniń kóterilýi tirkeldi. Qazirgi ýaqytta sýdy Arys ózenine aǵyzý jumystary júrgizilýde.
Qaza tapqandar men zardap shekkender joq. Jaýyn-shashyn toqtady, biraq sý aǵyny jalǵasýda», - delingen TJM habarlamasynda.
Taý betkeılerinen sýdyń aǵýy 3 aýdanda tirkeldi: Báıdibek (Shaıan, Tańatar, Yntymaq, Aqbulaq, Shaqpaq, Birlik, Myńbulaq, Qosbulaq), Saýran (Babaıqorǵan, Abaı, Úlgili, Orańǵaı, Maıdantal, Shaǵa), Ordabasy (Shubarsý, Badam, Shubar).
Qazir tasqyn sýy 17 eldi mekende kósheler men úılerdiń aýlalary arqyly aǵyp jatyr. Aldyn ala boljam boıynsha sý basqan jerler: 1 jeke turǵyn úı, 15 kóshe, 201 aýla aýmaǵy (Báıdibek - Aqbulaq aýyly - 1 jeke turǵyn úı (sý deńgeıi 15 sm), 7 kóshe jáne 77 aýla aýmaǵy, Ordabasy - 2 kóshe jáne 3 aýla aýmaǵy, Saýran - 6 kóshe jáne 121 aýla aýmaǵy) jáne Ordabasy aýdanyndaǵy mektep aýmaǵy (Islamqulov atyndaǵy mektep).
Buǵan deıin habarlaǵanymyzdaı, búgin tańerteń Túrkistan oblysynda birneshe eldi mekendi sý basyp qaldy. Óńirde jedel jeli iske qosyldy. Saýran aýdanynda mektep oqýshylary onlaın oqýǵa kóshti. Sondaı-aq osy aýdanda 7 balabaqsha jumysyn toqtatty.
Tasqyn sý aǵyny áli kelip jatyr.
Foto: t.me/qr_tjm
