Jańalyqtar  >
150 myń otbasyna 37 myń teńgeden astam somaǵa mektep formasy satyp alyp beriledi - mınıstrlik
2022 jylǵy 13 tamyz 14:01

150 myń otbasyna 37 myń teńgeden astam somaǵa mektep formasy satyp alyp beriledi - mınıstrlik

NUR-SULTAN. QazAqparat – Qazaqstanda 150 myńǵa jýyq otbasy balalaryn mektepke daıyndaý úshin memleketten qarjylaı kómek alyp úlgerdi. Bul kómekti áleýmettik osal sanattaǵy 440 myńnan astam bala alady.

Bul málimetterdi búgin QR Oqý-aǵartý mınıstrliginiń baspasóz qyzmeti taratty, dep habarlaıdy QazAqparat.

Baspasóz qyzmetiniń málimetterine qaraǵanda, bıyldan bastap mınıstrlik materıaldyq kómek kórsetý erejelerine ózgerister engizdi. Buǵan deıin óńirlerde bólingen soma 17-den 40 myń teńgege deıin bolsa, bıyl bul soma ulǵaıtylyp, keminde 37 389 teńgeni qurap otyr.

Sondaı-aq kómek kórsetý tetigine de ózgerister engizildi. Endi ata-analarǵa mektep formasyn, aıaq kıim, keńse taýarlaryn jáne t.b. balalarymen birge tańdap, satyp alýy úshin jeke shottaryna aqsha aýdarylady. Buryn munyń barlyǵyn ákimdikter satyp alatyn jáne ol taýarlardyń ólshemine, sapasyna jáne t.b. baılanysty máseleler týyndaıtyn.

Jalpyǵa birdeı bilim berý aıasynda ataýly áleýmettik kómek alatyn otbasylardyń balalaryna, sondaı-aq AÁK almaıtyn, biraq jan basyna shaqqandaǵy ortasha tabysy eń tómengi kúnkóris deńgeıinen tómen otbasylardyń balalaryna, jetim balalarǵa jáne ata-anasynyń qamqorlyǵynsyz qalǵan balalar, tótenshe jaǵdaıǵa tap bolǵan oqýshylarǵa jáne t.b. kórsetiledi.

«Kóp balaly analar kópten beri óz usynystaryn aıtyp keledi. Biz ony nazardan tys qaldyrmadyq. Endi ata-analar banktegi shotyna aqshany tikeleı alyp, balalarǵa mektep formasyn, keńse taýarlaryn jáne aıaq kıimin ózderi tańdaı alady. Budan bylaı bala ata-anasymen birge tańdaǵan mektep formasymen bara alady. Munyń artyqshylyǵy osynda. Buǵan deıin satyp alýmen ákimdikterdiń qyzmetkerleri aınalysatyn. Jyl saıyn ólshemderge, sapaǵa baılanysty problemalar týyndaıtyny esterińizde bolar, tipti balalar ol kıimmen júrýge uıalatyn. Qazir ákimdikter belsendi túrde ata-analardyń shotyna 37 389 teńgeden kem emes qarajatty aýdaryp jatyr. Bul eń tómengi soma. Buryn 17, 20, 25 myń teńge bólýi múmkin edi. Keı aımaqtar bul somadan artyq bólip jatyr, mysaly, Almaty 43 myń teńgeden. Bul kómekti alatyn 440 myńnan astam balanyń 150 myńǵa jýyǵyna aqsha aýdaryldy, qalǵanyna 20 tamyzǵa deıin aýdarylýy kerek», - dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Dýlat Jekebaev.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT