15-18 jastaǵy jasóspirimder jolaqynyń 50 paıyzyn ǵana tóleıdi – zań jobasy
2022 jylǵy 25 mamyr 12:25

15-18 jastaǵy jasóspirimder jolaqynyń 50 paıyzyn ǵana tóleıdi – zań jobasy

NUR-SULTAN. QazAqparat – QR Zańdary men kodeksterine halyqtyń áleýmettik osal toptaryna qoǵamdyq kólikte júrýge jeńildik beretin normalar engiziledi. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Májiliste aıtty, dep habarlaıdy QazAqparat tilshisi.

Aıta keteıik, Májiliste «QR keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy birinshi oqylymǵa shyǵaryldy.

Zań jobasy Qazaqstan Respýblıkasynyń 4 kodeksi jáne 16 zańyna ózgertýler men tolyqtyrýlar engizýdi kózdeıdi.

«Atap aıtqanda zań jobasy áleýmettik mańyzy bar, sondaı-aq qalalyq (aýyldyq), qala mańyndaǵy qatynasta avtomobılmen turaqty tasymaldaýda «Altyn alqa», «Kúmis alqa» men nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenimen nagradtalǵan kópbalaly analardyń, birinshi toptaǵy múgedekterdiń tegin jol júrý quqyǵyn kózdeıdi. 15 jastan 18 jasqa deıingi jastar bılet qunynyń 50 paıyzyn tóleı alady», - dedi Qaıyrbek Óskenbaev.

Mınıstrlik keltirgen derekterge sáıkes, Qazaqstanda 65 myńnan astam «Altyn alqa», 137 myńnan astam «Kúmis alqa», 15 myńnan astam «Batyr ana» ıegerleri bar.

І topta – 69 444, ІІ topta – 280 965 jáne ІІІ topta – 264 934 múgedektigi bar adam tirkelgen.

7 jasqa deıingi balalar sany 2 mıllıonnan assa, 7-15 jas aralyǵyndaǵy 2,7 mln bala jáne 16-18 jastaǵy 724 myń jas bar.

Aıta keteıik, elimizde 14 jasqa deıin balalar jolaqynyń 50 paıyzyn tóleıtin, al Nur-Sultanda 18 jasqa deıingi búkil jetkinshekke jolaqy tegin.

Depýtattar atalǵan zań jobasyn birinshi oqylymda tegis maquldady.


Seriktester jańalyqtary

Jańalyqtar

Úrdis

MURAǴAT