13 jasar bala Qara Ertis ózenine batyp ketti

ZAISAN. QazAqparat - Shyǵys Qazaqstan oblysynda 13 jasar bala ózenge batyp ketti, dep habarlaıdy QazAqparat oblystyq tótenshe jaǵdaılar departamentine silteme jasap.

Vedomstvonyń málimetinshe, búgin, 2 tamyz tústen keıin Qara Ertis ózeninde bolǵan qaıǵyly jaǵdaı týraly habar túsken. Bala ata-anasymen jáne týystarymen birge demalýǵa jaǵalaýǵa kelgen. Sosyn shomylyp júrip sýǵa batyp ketken.

«Týystary tez arada balaqaıdyń denesin sýdan shyǵaryp, Zaısan qalasyndaǵy aýrýhanaǵa aparǵan. Alaıda ony aman alyp qalý múmkin bolmady. Qutqarýshylardyń aıtýynsha, qaıǵyly jaǵdaıdyń sebebi - arnaıy jabdyqtalmaǵan jerde sýǵa túsý. Qara Ertis ózeninde aǵys óte qatty jáne túbi óte tereń, keı tustarynda ıirim bar» dep túsindirdi departamentten.

Qutqarýshylar aımaq turǵyndaryna jabdyqtalmaǵan, qyr-syryn bilmeıtin beıtanys jerde shomylý jáne sýǵa sekirý óte qaýipti ekenin eskertedi. Ásirese mas kúıde sýǵa túspegen abzal.